جوکووچ چھٹی مرتبہ آسٹریلین اوپن کے فاتح

نوواک جوکووچ نے اینڈی مرے کو چھ ایک، سات پانچ اور سات چھ سے شکست دی۔ ان دونوں کھلاڑیوں کے مابین یہ مقابلہ تقریباً تین گھنٹوں تک جاری رہا۔ اس طرح جوکووچ نے چھ مرتبہ یہ ٹورنامنٹ جیتنے کا آسٹریلوی کھلاڑی روئے ایمرسن کا ریکارڈ بھی برابر کر دیا ہے۔ روئے نے 1961ء سے 1967ء کے درمیان یہ کارنامہ انجام دیا تھا۔

اپنی فتح کے بعد جوکووچ نے مرے کو مخاطب کرتے ہوئے کہا ’’ اینڈی آج قسمت تم پر مہربان نہیں تھی۔ تم ایک بڑے کھلاڑی، اچھے دوست اور عظیم انسان ہو۔‘‘ عالمی نمبر ایک جوکووچ نے پہلی مرتبہ 2008ء میں یہ ٹائٹل حاصل کیا تھا۔ اس کے بعد وہ 2012ء میں اس ٹورنامنٹ کے فاتح قرار پائے اور پھر وہ 2011ء ،2013ء، 2015ء اور 2016ء میں آسٹریلین اوپن کے چیمپن بننے۔

یہ اس سرب کھلاڑی کا گیارہواں گرینڈ سلیم تھا اور اس طرح وہ ماضی کے عظیم ٹینس کھلاڑیوں روڈ لیوَر اور بیورن بورگ کی صف میں کھڑے ہو گئے ہیں۔ اس فہرست میں سوئس کھلاڑی راجر فیڈرر سب سے آگے ہیں۔ وہ ابھی تک سترہ مرتبہ گرینڈ سلیم جیت چکے ہیں۔

یہ پانچویں مرتبہ تھا جب اینڈی مرے نے آسٹریلین اوپن کے فائنل میں شکست کھائی ہے۔ تقریب تقسیم انعامات کے دوران جب مرے نے اپنی حاملہ اہلیہ کا شکریہ ادا کیا تو ان کی آنکھوں میں آنسو تھے۔ ’’ تمہارے تعاون کا شکریہ اور اب میرا اگلا پروگرام میرا گھر ہے۔‘‘۔ اینڈے مرے اگلے چند ہفتوں کے دوران باپ بننے والے ہیں۔

جوکووچ نے ابھی حال ہی میں قطری دارالحکومت دوہا میں اسپین کے رافائل نادال کو شکست دی تھی جبکہ وہ آسٹریلین اوپن کے فائنل میں سوئس کھلاڑی راجر فیڈر کو شکست دے کر پہنچے تھے۔ ٹینس کی دنیا میں ایک سال میں چار گرینڈ سلیم مقابلے ہوتے ہیں۔ ان میں آسٹریلین اوپن پہلا، اس کے بعد مئی جون میں فرانسیسی دارالحکومت پیرس کا فرنچ اوپن پھر جون جولائی میں برطانوی شہر لندن میں کھیلا جانے والا ومبلڈن اور پھر سال کا آخری گرینڈ سلیم یو ایس اوپن اگست ستمبر میں نیو یارک میں کھیلا جاتا ہے۔