جنسی غلامی سے آزادی پانے والی لڑکیوں کا ’مسیحا‘

روئٹرز فاؤنڈیشن نے اپنے ایک جائزے میں پائل کے المیے کو موضوع بنایا ہے، جس میں مشرف حسین کا کردار انتہائی اہم ہے۔ پائل مچھلیاں پکڑنے کے لیے استعمال ہونے والے ایک جال کے نیچے چھپ کر بھارتی شہر پونا پہنچی۔ وہاں پہنچتے ہی اُسے انسانوں کی تجارت کرنے والوں کے ہاتھ فروخت کر دیا گیا، جنہوں نے اس پر تشدد کیا اورایک چھوٹے سے کمرے میں بند کر دیا۔ ان افراد نے بعد ازاں اسے جسم فروشی پر بھی مجبور کر دیا۔

نو مہینے اور گیارہ دن اس اذیت میں رہنے کے بعد پائل کو اس غلامی سے آزادی ملی۔ اسے علم نہیں تھا کہ اب وہ بنگلہ دیش واپس کیسے پہنچے گی۔

بھارت میں جسم فروشی کے لیے قانونی جنگ

بھارت: جسم فروشی کے اڈوں پر چھاپے، تيس خواتین بازیاب

 

ٹھیک اس موقع پر پونا سے ڈیڑھ ہزار کلومیٹر دور نئی دہلی میں بنگلہ دیشی ہائی کمیشن میں قونصلر کے شعبے کے سربراہ مشرف حسین انسانوں کے تاجروں کے چنگل سے آزاد کرائی جانے والی کئی سو لڑکیوں کے سفری دستاویزات تیار کروانے میں مصروف تھے، ’’مجھے بنگلہ دیش کی ایک ایسی لڑکی اور  ایک لڑکا ملے، جو طویل عرصے سے واپس جانے کے کوششوں میں لگے ہوئے تھے۔ یہ لوگ بہت مشکل میں تھے۔ اس کی وجہ یہ ہے کہ ہمارا تحقیقاتی عمل بھی بہت سست ہے۔‘‘

گزشتہ دو برسوں سے حسین ان کوششوں میں لگے ہیں کہ جنسی مقاصد کے لیے بنگلہ دیش سے بھارت لائی جانے والی لڑکیوں کو بازیابی کے بعد جلد از جلد واپس ان کے گھروں کو بھیجا جائے۔ اس مقصد کے لیے وہ خواتین کو تحفظ فراہم کرنے والے کئی مراکز کے دورے بھی کر چکے ہیں اور اسی دوران پونا میں ان کی ملاقات پائل سے ہوئی تھی۔ حسین نے بتایا کہ پائل اگلے دو مہینوں کے دوران اپنے گھر واپس لوٹ جائے گی۔

حسین کی کوششوں کی وجہ سے اب تک 438 لڑکیاں واپس اپنے گھروں میں پہنچ چکی ہیں۔ ذرائع کے مطابق اغوا یا نوکری کا جھانسہ دے کر زیادہ تر لڑکیوں کو بھارتی ریاست مہاراشٹر لایا جاتا ہے۔