جرمن وزیرخارجہ کی اسرائیلی صدر سے ملاقات، قیام امن کی کوششوں میں تیزی

وفاقی جرمن وزیر خارجہ فرانک والٹر اشٹائن مائر نے اپنے مشرق وسطی دورے کے دوران مصری حکام کو دعوت دی کہ برلن حکومت مصری سرحدوں کے راستے غزہ میں ہتھیاروں کی اسمگلنگ روکنے کےلئے خدمات مہیا کر سکتی ہے۔ قاہرہ میں مصری صدرحسنی مبارک سے ملاقات کے بعد انہوں نے رفاہ سرحد کا دورہ بھی کیا۔ انہوں نے کہا کہ جرمن ماہرین مصری پولیس کو تربیت دیں گے جس سے ان کی استعداد کاری میں اضافہ ہو گا۔

اپنے دو روزہ دورہ مشرق وسطی کے دوران جرمن وزیر خارجہ غزہ میں جنگ بندی کے لئے علاقائی رہنماوں سے ملاقات کر رہے ہیں۔ ہفتے کے دن شٹائن مائر نے فلسطینی صدر محمود عباس اور عرب لیگ کے صدر امر موسی سے بھی ملاقات کی۔ اس کے علاوہ وہ اپنی اسرائیلی ہم منصب زپی لیونی اوراسرائیلی وزیردفاع اے ہود باراک سے بھی ملاقات کریں گے۔

قاہرہ میں مصری صدر حسنی مبارک سے ملاقات کے بعد صحافیوں سے گفتگو کرتے ہوئے جرمن وزیر خارجہ نے کہا کہ غزہ کی موجودہ انسانی صورتحال اس بات کا تقاضا کر تی ہے کہ تمام یورپی اور عالمی برادری غزہ میں پائیدار، مستقل اور موثر جنگ بندی کے لیے کوششیں کریں۔

حماس جنگجووں اور اسرائیلی افواج کی طرف سے سلامتی کونسل کی جنگ بندی کی قرارداد کو مسترد کرنے کے بعد جرمنی نے بھی مشرق وسطی میں قیام امن کی کوششوں میں براہ راست حصہ لیتے ہوئے اپنے وزیر خارجہ کو مشرق وسطی روانہ کیا۔

اس سے قبل جرمن حکام نے کہا تھا کہ غزہ پٹی میں جرمن افواج کی تعیناتی بین الاقوامی امن مشن کے تحت ہی ممکن ہو سکتی ہے۔ اس سلسلے میں جرمن وفاقی وزیر برائے خارجہ امور Gernot Erler نے اپنے نشریاتی انٹرویو میں کہا کہ تاہم اس کے لئے فلسطین اور اسرائیل کوباضابطہ درخواست کرنا ہو گی۔