1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

بنڈس لیگا : ڈورٹمنڈ شٹٹ گارٹ کو نہ پچھاڑ سکی

23 جنوری 2011

جرمنی کی قومی فٹ بال چیمپیئن شپ بنڈس لیگا کے 19ویں میچ ڈے میں ہفتے کو ڈورٹمنڈ اور شٹٹ گارٹ کا مقابلہ ایک ایک گول سے برابر رہا۔ اس کے باوجود ڈورٹمنڈ کی لیگ میں پہلی پوزیشن کو فی الحال کوئی خطرہ نہیں۔

https://p.dw.com/p/1017Q
تصویر: AP

اس وقت ڈورٹمنڈ کے 47 پوائنٹس ہیں اور اسے دوسرے نمبر کی ٹیم ہینوور کے مقابلے میں اب بھی 13 پوائنٹس کی برتری حاصل ہے۔

ڈورٹمنڈ کی طرف سے کھیل کے پہلے ہاف میں ایک گول کی برتری حاصل کی گئی تاہم شٹٹ گارٹ کے Pavel Pogrebnyak نے یہ برتری کھیل کے اختتام سے صرف پانچ منٹ قبل ختم کر دی اور اس کے بعد ڈورٹمنڈ کی ٹیم دوبارہ برتری حاصل کرنے میں ناکام رہی۔

19 میچ کھیلنے والی ڈورٹمنڈ کی ٹیم کی لیگ میں دوسرے نمبر کی ٹیم سے 13 پوائنٹس کا فرق، اب لیورکوزن اور میونشن گلاڈباخ کی ٹیموں کے درمیان آج اتوار کے روز کھیلے جانے والے میچ پر منحصر ہے۔ لیورکوزن کی ٹیم یہ میچ جیت گئی، تو ڈورٹمنڈ کی یہ برتری 11 پوائنٹس رہ جائے گی۔

اس وقت لیگ میں دوسرے نمبر پر ہینوور کی ٹیم ہے، جس کے 34 پوائنٹس ہیں۔ لیورکوزن کی ٹیم کے 33 پوائنٹس ہیں تاہم اسے اس میچ ڈے کا اپنا میچ ابھی کھیلنا ہے۔

Flash Galerie Borussia Dortmund - VfB Stuttgart
شٹٹ گاڑٹ نے ڈوٹمنڈ کے خلاف زبردست دفاعی کھیل کا مظاہرہ کیاتصویر: picture alliance / dpa

بنڈس لیگا کے اس میچ ڈے کی ایک اور خاص بات دفاعی چیمپیئن بائرن میونخ کی ٹیم کا شاندار کھیل تھا۔ بائرن میونخ کائزرزلاؤٹرن کو ایک کے مقابلے میں پانچ گول سے شکست دے کر اپنے پوائنٹس کی مجموعی تعداد 33 کرتے ہوئے لیگ میں تیسری پوزیشن پر پہنچ گئی ہے۔ بائرن میونخ کی طرف سے ماریو گومیز نے ہیٹرک کی۔ گومیز کی طرف سے کھیل کے 47 ویں، 80 ویں اور 85 ویں منٹ میں گول کیے گئے۔

ہفتے کو کھیلے گئے دیگر میچوں میں کولون نے بریمن کو صفر کے مقابلے میں تین گول سے ہرا دیا۔ مائنز کو وولفس برگ نے ایک صفر سے شکست دے دی جبکہ ہینوور کو شالکے کے ہاتھوں صفر کے مقابلے میں ایک گول سے شکست کا سامنا کرنا پڑا۔ فرائی برگ اور نیورمبرگ کے درمیان کھیلا گیا میچ ایک ایک سے برابر رہا۔

اتوار کو دو میچز کھیلے جا رہے ہیں۔ لیورکوزن کا میچ میونشن گلاڈباخ سے جبکہ ہوفن ہائم کا میچ سینٹ پاؤلی کی ٹیم سے ہو رہا ہے۔

رپورٹ : عاطف توقیر

ادارت : ندیم گِل

اس موضوع سے متعلق مزید سیکشن پر جائیں

اس موضوع سے متعلق مزید

مزید آرٹیکل دیکھائیں