ایران کے لئے دروازے اب بھی کھلے ہیں: کلنٹن

اپنے دورہ کولمبیا کے دوران ایک بیان میں کلنٹن نے کہا کہ عالمی برادری کا ہدف ایران کو ایٹمی ہتھیاروں کی تیاری سے باز رکھنا ہے۔ انہوں نے مزید کہا کہ تہران کے خلاف سلامتی کونسل کی ان نئی پابندیوں کی منظوری کے بعد بھی ترکی اور برازیل ایران کے ساتھ بات چیت جاری رکھ سکتے ہیں۔

اقوام متحدہ کی سلامتی کونسل کے اجلاس میں بدھ کے روز ایران مخالف پابندیوں کے چوتھے دور کو بھی منظور کر لیا گیا۔ پابندیوں کی قرارداد پر ہونے والی ووٹنگ میں سلامتی کونسل کے پانچ مستقل اور دس غیر مستقل اراکین نے اپنی رائے دی۔ اس قرار داد کے حق میں 12 ووٹ پڑے۔ برازیل اور ترکی نے تہران مخالف پابندیوں کے خلاف ووٹ دیا، جبکہ لبنان نے ووٹنگ میں حصہ نہیں لیا۔

اس سے قبل ترکی اور برازیل نے ایران کے ساتھ کم افزودہ یورینیم کے بدلے درمیانے درجے تک افزودہ یورینیم کی ترسیل کا معاہدہ کیا تھا، تاہم واشنگٹن نے وہ معاہدہ مسترد کرتے ہوئے پابندیوں پر زور دیا تھا۔

سلامتی کونسل کی جانب سے تہران مخالف پابندیوں کی قرارداد پر ووٹنگ کے بعد سامنے آنے والی صورتحال پر کلنٹن نے صدر اوباما سے ٹیلی فون پر گفتگو کی۔

کلنٹن نےصحافیوں سے بات چیت میں کہا کہ ان پابندیوں کی مدد سے ایران کو جوہری ہتھیاروں کی تیاری سے باز رکھنے میں بڑی حد تک مدد ملے گی تاہم انہوں نے کہا کہ امریکہ چاہتا ہے کہ تہران مذاکرات کی میز پر واپس آئے۔ کلنٹن کے بقول تہران کو سلامتی کونسل کے پانچ مستقل اراکین اور جرمنی کے ساتھ مذاکرات پر آمادہ ہونا ہی پڑے گا۔

دوسری جانب ترکی اور برازیل نے کہا ہے کہ ایران کے خلاف پابندیوں کا فیصلہ ایک ’بڑی غلطی‘ ہے۔ برازیلی صدر لولا ڈی سلوا نے اپنے ایک ٹیلی ویژن خطاب میں کہا کہ یہ پابندیاں عائد کر کے عالمی برادری نے ایک بڑا اہم موقع ضائع کر دیا ہے۔ لولا ڈی سلوا نے کہا کہ بدقسمتی کی بات یہ ہے کہ اب جب کہ ایران مذاکرات پر آمادہ تھا، اس وقت عالمی برادری نے اس کے خلاف پابندیاں عائد کر کے بات چیت کے دروازے کو بند کر دیا ہے۔

ترک وزیرحارجہ احمت داوت اگلو نے اپنے ایک بیان میں ان پابندیوں پر تشویش ظاہر کی ہے۔ انہوں نے کہا کہ انقرہ کی اب بھی یہی کوشش ہو گی کہ وہ گزشتہ ماہ ایران کے ساتھ ایندھن کی لین دین کے حوالے سے طے پانے والے معاہدے کو اس کی اصل روح کے ساتھ عمل کرانے میں اپنا کردار ادا کرے۔

یورپی یونین کی خارجہ امور کی سربراہ کیتھرین ایشٹن نے کہا ہے کہ تہران مخالف پابندیوں کا یہ مطلب ہرگز نہیں کہ اب تہران سے مذاکرات ممکن نہیں رہے۔ انہوں نے کہا کہ اگر تہران سنجیدہ مذاکرات پر آمادگی ظاہر کرے تومذاکرات ممکن ہیں۔

رپورٹ : عاطف توقیر

ادارت : عدنان اسحاق