التباس پر امن کا قیام ممکن نہیں، اسرائیلی وزیراعظم

اسرائیلی وزیر اعظم نیتن یاہو نے اپنے پانچ روزہ دورہء امریکہ کے دوران جمعے کو امریکی صدر باراک اوباما سے ملاقات کی۔ اس دوران دونوں رہنماؤں نے اعتراف کیا کہ مشرق وسطیٰ میں پائیدار قیام امن کے لیے دونوں کے مابین اختلافات پائے جاتے ہیں۔

جمعرات کو امریکی صدر باراک اوباما نے مشرق وسطیٰ اور شمالی افریقی ممالک کے لیے اپنے نئے وژن کا اعلان کیا تھا۔ اس دوران اوباما نے کہا تھا کہ مشرق وسطیٰ میں قیام امن کے لیے ناگزیر ہے کہ اسرائیلی حکومت مستقبل کی آزاد فلسطینی ریاست کی سرحدوں کا تعین 1967ء کی جنگ سے پہلے کی بنیادوں پر کرے۔ اس پر اسرائیلی وزیراعظم نے شدید ردعمل کا اظہار کرتے ہوئے کھلے الفاظ میں کہا ہے کہ اگر یوں ہوا تو اس کا مطلب ہو گا کہ اسرائیل نے اپنی دفاعی صلاحیتوں پر سمجھوتہ کر لیا ہے۔

بینجمن نیتن یاہو نے امریکی صدر اوباما سے ملاقات کے بعد دہرایا کہ اگر آزاد فلسطینی ریاست کے حوالے سے امریکی صدر کے نئے وژن کو قبول کر لیا جائے، تو اسرائیل کی دفاعی صلاحیت مفلوج ہو جائے گی۔ اوول آفس میں ہونے والی اس ملاقات میں نیتن یاہو نے کہا کہ التباسات کی بنیاد پر امن کا قیام ممکن نہیں ہے۔

نیتن یاہو نے کہا کہ وہ خطے میں قیام امن کے لیے سمجھوتہ کرنے کے لیے تیار ہیں تاہم اس حوالے سے واشنگٹن حکومت کی تجاویز پر انہیں تحفظات ہیں۔

امریکی صدر باراک اوباما نے بھی اسرائیلی وزیراعظم کے ساتھ اختلافات کا اعتراف کرتے ہوئے کہا ہے کہ اس طرح کے اختلافات ’دوستوں کے مابین‘ ہی ہوتے ہیں۔ اوباما اور نیتن یاہو کی مشترکہ پریس کانفرنس کے دوران امریکی صدر نے فلسطینی سرحدوں کے حوالے سے کوئی بات نہیں دہرائی۔

خبررساں ادارے روئٹرز کے مطابق دونوں رہنماؤں نے آزاد فلسطینی ریاست کے قیام کے حوالے سے گفتگو کرنے کے علاوہ عرب ممالک میں حالیہ عوامی انقلابات پر بھی تبادلہ خیال کیا۔ دونوں رہنماؤں نے اس امر پر بھی غور کیا کہ خطے کی بدلتی ہوئی صورتحال سے امریکہ اور اسرائیل کس طرح متاثر ہو سکتے ہیں۔

دوسری طرف عرب لیگ کے سربراہ امر موسیٰ اور فلسطینی انتظامیہ کے صدر محمود عباس نے امریکی صدر پر زور دیا ہے کہ وہ مشرق وسطیٰ میں قیام امن کے حوالے سے پیش کردہ اپنے نئے وژن پر قائم رہیں اور اسرائیلی حکومت پر دباؤ میں اضافہ کریں۔

جرمن چانسلر انگیلا میرکل سمیت کئی اہم یورپی رہنماؤں نے بھی مشرق وسطیٰ اور شمالی افریقی ممالک کے حوالے سے امریکی صدر باراک اوباما کی نئی پالیسی کا خیر مقدم کیا ہے۔

رپورٹ: عاطف بلوچ

ادارت: عاطف توقیر