Polisi Ujerumani wachunguza kisa cha lori lililoibiwa | Matukio ya Kisiasa | DW | 08.10.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo

Matukio ya Kisiasa

Polisi Ujerumani wachunguza kisa cha lori lililoibiwa

Polisi Ujerumani inamshikilia raia wa Syria kwa tuhuma za kuiba lori alilolitumia kuyagonga magari yaliyokuwa yamesimama kwenye taa za barabarani katika mji wa Limburg ulioko magharibi mwa Ujerumani.

Vyombo vya habari vya Ujerumani viliwanukuu maafisa wa usalama wakisema tukio hilo lililotokea jana jioni linachukuliwa kama ni la kigaidi. Mwendesha mashitaka Ralf Badle amekataa kuzungumzia hilo, lakini akisema linachukuliwa kama jaribio la mauaji. Amesema polisi ilifanya msako kwenye makazi yanayohusishwa na mtuhumiwa na kukamata simu za mkononi na vifaa vya kuhifadhia data na kuongeza kuwa uchunguzi bado unaendelea. 

Kijana huyo wa miaka 32 alitarajiwa kufikishwa mbele ya jaji ambaye ataamua iwapo kuna haja ya kutoa waranti rasmi wa kukamatwa.

Kwa mujibu wa shirika la habari la Ujerumani – DPA, ni kuwa aliwasili Ujerumani kutokea nchi aliyolaziliwa Syria mwaka wa 2015 na akaishi katika eneo la Offenbach karibu na Frankfurt. Alipewa ulinzi mwaka uliopita – hadhi wanayopewa wale ambao hawatimizi viwango vya kuwa wakimbizi, lakini wako hatarini kama watarejea katika nchi zao walizotoka.

Waziri wa Mambo ya Ndani wa Ujerumani Horst Seehofer amesema chanzo cha tukio hilo bado hakijawa wazi.

Shirika la habari la Umma ZDF, likitaja duru za kiusalama ambazo hazikutajwa, limesema mapema leo kuwa maafisa wanaamini tukio hilo linahusishwa na itikadi kali. Alipoulizwa kama kuwa uwezekano lilikuwa shambulizi la kigaidi, waziri Seehofer aliwaambia wanahabari kabla ya mkutano wa Umoja wa Ulaya mjini Luxembourg kuwa kwa wakati huu kitendo hicho bado kinachunguzwa.

Ofisi ya mwendesha mashitaka ambayo huzishughulikia kesi za ugaidi nchini Ujerumani, imesema kuwa kwa sasa, haina mamlaka kuhusiana na kesi hiyo, kwa sababu hakuna ushahidi wa kutosha kwamba lilikuwa shambulizi la kigaidi.

Tukio hilo limetokea karibu miaka mitatu baada ya muomba hifadhi wa Kitunisia aliyenyimwa kibali kuwauwa watu 12 kwa kuwagonga na lori katika soko la Krismasi mjini Berlin.

Matangazo

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com