Kevin-Prince Boateng arudi katika Bundesliga

Inaripotiwa kwamba Schalke iliwalipa wataliana euro milioni 12 kumpata Kevin -Prince Boateng, nyota wa timu ya taifa ya kandanda ya Ghana. na mkataba wake unajumuisha uwezekano wa kuongezewa msimu wa nne. "Bundesliga ndio ligi nzuri kabisa ulimwengu na ndiko wachezaji bora duniani wanakokwenda," alisema mchezaji huyo wa umri wa miaka 26 katika mkutano na waandishi wa habari mjini Gelsenkirchen. "Nimesema kila mara kwamba nilitaka kucheza nchini Ujerumani."

Kevin, ambaye ni kakake mchezaji wa safu ya ulinzi wa timu ya Bayern Munich na timu ya taifa ya Ujerumani, Jerome Boateng, alianza kibarua cha kucheza soka katika klabu ya Hertha Berlin na kuhamia Tottenham Hotspur, England, kwa kitita cha euro milioni 7.9 mnamo mwaka 2007. Alirejea kwa muda mfupi Ujerumani kwa mkopo katika timu ya Borussia Dortmund, mahasimu wa Schalke, kabla kujiunga na Portsmouth na baadaye kwenda Milan.

Ni mchezaji mahiri

Boateng alifunga mabao mawili katika ushindi wa Milan siku ya Jumatano dhidi ya PSV Eindhoven katika duru ya pili ya mchuano wa mchujo na kufaulu kushiriki mashindano ya kuwania kombe la mabingwa wa Ulaya, Champions League, msimu huu kwa jumla ya magoli 4-1.

"Ni mchezaji wa kipekee mwenye uwezo mkubwa na ujuzi wa uongozi," amesema kocha wa Schalke, Jens Keller. Pamoja na nyota wa Schalke, Julian Draxler, mwenye umri wa miaka 19, Boateng huenda akaunda ushirikiano imara. Meneja wa Schalke, Horst Heldt, amefutilia mbali uwezekano wa kumuuza Draxler kabla muda wa wachezaji kuhamia timu nyengine kumalizika wiki ijayo. "Itakuwa hatua ya kuchanganyikiwa kumpa mkataba mchezaji mzuri kisha baadaye umuache mwingine aondoke. Hilo silo tunalolitaka," akaongeza kusema Heldt.

Boateng anaweza kucheza katika mechi ya leo dhidi ya Leverkusen, licha ya kufungiwa mechi nne wakati alipotolewa uwanjani kwa kumpiga usoni mchezaji wa timu nyingine katika mechi yake ya mwisho kati ya Dortmund na Wolfsburg mnamo mwaka 2009.

Mwandishi: Josephat Charo

Mhariri: Caro Robi