kazi kubwa yamsubiri Rouhani Iran

Kwa  mujibu  wa  baraza  la  ushauri  nchini  Iran  karibu  asilimia  99  ya wagombea  wa  uchaguzi  waliondolewa  na  kuacha  nafasi  finyu  ya kuweza  kuleta  mshangao,  baada  ya  kubakia  wagombea  sita   tu katika  uchaguzi  huo. Hassan Ruhani  mwenye  msimamo  wa  wastani pamoja  na  wagombea  wengine  watano  wahafidhina  waliingia  katika kinyang'anyiro  hicho  cha  kuwania  madaraka.

Hakuwapo  mgombea  ambaye  ni  maarufu  miongoni  mwa  wahafidhina waliogombea  uchaguzi  huo , na  Ruhani  alikuwa  hafahamiki sana. Kwa  hiyo  mtu  angetarajia  kuwa  uchaguzi  huo  ungeingia katika  duru  ya  pili,  kwa  kiasi  kikubwa  baina  ya  wagombea  wawili wahafidhina. Na  ghafla  kila  kitu  kikaenda tofauti kabisa.

Uchaguzi  wa  rais  nchini  Iran  umeamuliwa   katika  duru  ya  kwanza tu.

Zoezi la  kuhesabu kura

Zoezi  la  kuhesabu  kura  lilikawia  kuliko  ilivyopangwa.  Shauku ilikuwa  inapanda  kila  dakika, hadi  pale  wizara  ya  mambo  ya  ndani nchini  Iran  ilipotoa  rasmi  matokeo  ya  uchaguzi  huo.

Hakuna  mtu  aliyefikiria  kuwa  Ruhani  angepata  ushindi  mkubwa  na usio  na  shaka  namna  hiyo.

Hali  hii  iliwezekanaje  basi?

Hali  ya  jamii  nchini  Iran  ni  mbaya kwa  kweli. Ukosefu  mkubwa  wa ajira, ughali  wa  maisha  unaopindukia  mipaka, uchumi  uliodumaa, vikwazo  vikali  na  mengi  mengine  yanaonekana   katika  maisha  ya kila  siku  katika  nchi  hiyo.

Na  juu  ya  hayo  linakuja  pigo  la  kisiasa , ambalo  lilitokana  na ukandamizaji  wa  vuguvugu  la  maandamano  baada  ya  uchaguzi  wa mwaka  2009.

Hali  kama  hiyo  ikiendelea  kwa  muda  mrefu  si  rahisi  kuizuwia  na huzaa  bila  shaka  hali  ya  kutoridhika , ambayo  inaakisi  matokeo  ya uchaguzi  huu.

Je ni  kura ya  maoni?

Matokeo  ya  uchaguzi  wa  rais  nchini  Iran  ni  kura  ya  kukataa kabisa  mpango  wa  kinuklia  pamoja  na  sera  za  mambo  ya  kigeni ya  wahafidhina  na  wakati  huo  huo  pigo  kwa   kiongozi  wa  kidini Ayatollah Ali  Khamenei.

Ndio  sababu  Hassan Ruhani  katika  muda  wa  chini  ya  wiki  moja amekuwa  mtu  anayebeba  matumaini  ya   wananchi  wa  nchi  hiyo, katika  kipindi  hiki  ambacho  wananchi  wamepoteza  matumaini. Tangu  siku  ya  kwanza  anakabiliana   na  changamoto  kubwa .

Anatakiwa  kwa  haraka  kutafuta  njia  ya  kuondoka  kutoka  katika mkwamo  wa  mazungumzo  ya  kinuklia, atafute  muafaka  na kubadilisha  sera  ambazo  hazina  tija  na  za  kuchochea  mambo. Ni kwa  njia  hiyo  tu  anaweza  kuwa  na  matumaini  ya  kuupooza  mzozo huo , ili kuweza  kulegezwa  vikwazo  na  pia  kuifanya   hali  ya  kijamii kuwa  bora  nchini  mwake.

Kwa  upande  mwingine  analazimika  kuongoza   upatanishi  na  jamii. Hali  hiyo  inawezekana  tu , iwapo  hatua  za  ukandamizaji  dhidi  ya jamii  zitasitishwa, wafungwa  wa  kisiasa  wataachiwa huru , hatua  za kuwekwa  kifungo  cha  nyumbani  kwa  mwanamageuzi  Mussawi pamoja  na  Karoubi  zitaondolewa , na   mbali  ya  hayo  uhuru  wa vyombo  vya  habari  pamoja  na uzuwiaji   upatikanaji  wa  taarifa utaondolewa.

Bila  shaka  kwa  kuchaguliwa  Ruhani  matarajio  ni  makubwa.   Mbali ya  kwamba  tunatambua   kuwa   njia  ya  malengo  hayo  ni   yenye mteremko  mkubwa  na  yenye  vikwazo  vingi.  Kwa  upande  mmoja kiongozi  wa  kidini , kuhusiana  na  masuala  muhimu  kama  suala  la kinuklia , ana  usemi  mkubwa. Kwa  upande  mwingine  wahafidhina katika  bunge  wana  nguvu  kubwa. 

Kwa  hiyo  ushindi  katika  uchaguzi wa  rais  ni  hatua  ya   kwanza. Matumaini  makubwa  yanaweza kuelekeza  katika  kuvunjwa  moyo  kukubwa,  watu  wa  Iran hilo wamekwisha  kuliona  mara  kwa  mara. Lakini  mara  hii, wakati  ni mfupi  mno  na  gharama  za  kuvunjika  tena  moyo  ziko  juu  mno.

Mwandishi: Jamsheed Faroughi / ZR /Sekione  Kitojo

Mhariri: Josephat Charo