Tembelea tovuti mpya ya DW

Tazama toleo la beta la dw.com. Bado hatujamaliza! Maoni yako yanaweza kutusaidia kuiboresha.

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo
Matangazo
Matangazo

Taarifa ya Habari za Ulimwengu kutoka Idhaa ya Kiswahili ya DW

Habari | 29.11.2022 | 09:00

Mawaziri wa mambo ya nje wa NATO kukutana Bucharest

Katibu mkuu wa Jumuiya ya kujihami NATO Jens Stoltenberg anatarajiwa kuwatolea mwito washirika wa jumuiya hiyo kutoa ahadi ya msaada zaidi kwa Ukraine, katika kipindi hiki cha majira ya baridi kali.Wito huo unatarajiwa kutolewa katika mkutano utakaofanyika leo na kesho Jumatano.Kabla ya mkutano huo Stoltenberg amegusia kuhusu matarajio yake kwa kusema ''Nina uhakika kwamba wakati mawaziri wa mambo ya nje watakapokutana leo na kesho,ujumbe utakaotolewa utakuwa unazungumzia haja ya kuendelea na kuimarisha uungaji mkono wetu na hasa linapokuja suala mfano la mifumo ya ulinzi kuisaidia Ukraine kujilinda dhidi ya mashambulizi yote ya anga na mengine ambayo wanaendelea kukumbana nayo''Kadhalika wito huo unakuja baada ya rais wa Ukraine kuwaambia wananchi wake kutarajia wiki nyingine ya baridi na kiza kufuatia mashambulizi yaliyofanywa na Urusi dhidi ya miundo mbinu ya Ukraine. Mawaziri wa mambo ya nje wa Jumuiya ya NATO watakaokutana mjini Bucharest,nchini Romania watajikita kuzungumzia hatua ya kuongeza msaada wa kijeshi kwa Ukraine ikiwemo mifumo ya ulinzi wa anga pamoja na silaha pamoja na msaada usiokuwa wa kijeshi kama mafuta,vifaa tiba,na vifaa vinavyotumika wakati wa baridi kali. Ujerumani ambayo hivi sasa inashikilia uongozi wa kundi la nchi tajiri kiviwanda duniani,G7 nayo inapanga mkutano na baadhi ya washirika wa kundi hilo pembezoni mwa mkutano huo wa NATO wakati ikijaribu kushinikiza hatua za kuharakisha ujenzi mpya wa miundo mbinu ya nishati ya Ukraine.

Rais Emmanuel Macron aelekea Marekani

Rais wa Ufaransa Emmanuel Macron anaelekea Washington,Marekani katika ziara yake ya kwanza ya kiserikali tangu alipoingia madarakani rais Joe Biden. Hatua hiyo ya kufufua juhudi za kidiplomasia ilisitishwa kutokana na janga la Covid-19.Uhusiano kati ya marais hao wawili ulikuwa na mwanzo mbaya ambapo ilishuhudiwa rais Macron akimuita nyumbani kwa muda balozi wake nchini Marekani mwaka jana baada ya serikali ya Marekani kutangaza makubaliano ya kuiuzia Australia nyambizi zinazoendeshwa kwa nguvu za Nyuklia na kuuhujumu mkataba wa Ufaransa wa kutaka kuiuzia Autsralia nyambizi zinazotumia mafuta ya Diesel. Viongozi hao wawili watakaa kwa mazungumzo mnamo siku ya alhamisi katika ikulu ya White House yatakajikita katika suala la mpango wa Nyuklia wa Iran, kuzidi kujiingiza kwa China katika eneo la nchi za bahari ya Pasifiki, na kuongezeka wasiwasi kuhusu usalama na uthabiti katika kanda ya Sahel barani Afrika.Aidha egenda kuu zaidi katika mazungumzo yao ni Ukraine. Rais Macron ameongozana kwenye ujumbe wake na mawaziri wa mambo ya nje,Ulinzi na fedha pamoja na viongozi wa kibiashara na wanaanga.

Marekani yasema yafuatilia kwa karibu kinachoendelea China

Rais Joe Biden wa Marekani anafuatilia vurugu zinazoendelea huko China,zikihusisha waandamanaji wanaodai kufikishwa mwisho hatua za kufungwa kwa shughuli za maisha zinazolenga kuzuia usambaaji wa virusi vya Corona.Waandamanaji pia wanadai uhuru zaidi wa kisiasa.Ikulu ya Marekani imesema rais Biden anafuatilia kinachoendelea China katika wakati ambapo pia ndani ya Marekani yamezuka maandamano ya kuonesha mshikamano na waandamanaji nchini China.Msemaji wa baraza la usalama la Marekani John Kirby amewaambia waandishi habari jana Jumatatu kwamba wanatazama kinachojitokeza kutoka China lakini rais Biden hatozungumza kwa niaba ya waandamanaji duniani isipokuwa waandamanaji watajipazia sauti wenyewe.Ingawa ametilia mkazo kwamba Marekani inaunga mkono haki ya waandamanaji. Wizara ya mambo ya nje ya Marekani jana ilisema sera ya China kuhusu kuzuia virusi vya Corona imepindukia mipaka na kwamba itakuwa vigumu kwa nchi hiyo kudhibiti usambaaji virusi hivyo kwa kutumia mkakati wake huo.

UNCTAD yatahadharisha kuhusu uchafuzi wa mazingirira unaofanywa na meli

Umoja wa mataifa umetoa tahadhari kwamba gesi ya Carbon inayochafua mazingira inayotoka kwenye vyombo vya usafiri wa majini inaongezeka.Umoja huo umetowa mwito kwa sekta hiyo ya usafiri wa majini kuzipiga marufuku meli zilizochakaa na zinazotowa moshi unaochafua mazingira pamoja na kuimarisha miundo mbinu ili kuharakisha kuingia kwenye mifumo isiyochafua mazingira. Shirika la Umoja wa mataifa la biashara na maendeleo,UNCTAD limetaja kuhusu dhima muhimu ya sekta hiyo ya usafiri wa majini katika uchumi wa dunia,ambapo zaidi ya asilimia 80 ya bidhaa za bishara duniani husafirishwa kupitia baharini. Hata hivyo mkuu wa shirika hilo,Rebeca Grynspan amewaambia waandishi habari kabla ya kuzinduwa ripoti ya mwaka ya UNCTAD kuhusu usafiri wa majini,kwamba wakati dunia inafahamu umuhimu wa kupunguza gesi chafu ili kuzuia majanga ya mabadiliko ya tabia nchi,sekta hiyo imeshuhudia uzalishaji wa gesi chafu ukiongezeka kwa asilimia 4.7 kati ya mwaka 2020 na 2021 pekee.

Ujerumani na Qatar zatia saini makubaliano ya usafirishaji gesi Oevu asilia

Qatar na Ujerumani zimetia saini makubaliano ya kusafirishwa gesi asili ya kimiminika kutoka Doha kwenye nchi hiyo yenye nguvu kubwa kiuchumi barani Ulaya. Ujerumani inapambana kutafuta msambazaji mbadala wa gesi baada ya Urusi kukatisha usambazaji wa gesi yake kwa Ujerumani wakati wa vita vya Ukraine vinavyoendelea. Usambazaji wa gesi hiyo kutoka Qatar utaanza mwaka 2026 ingawa haikutajwa gharama zitakazohusika.Makubaliano hayo yanazihusisha Kampuni ya nishati inayosimamiwa na serikali ya Qatar pamoja na kampuni ya ConocoPhillips ambayo ina hisa katika vinu vya gesi asilia katika pwani ya ghuba ya uajemi ambayo inapakana na Iran. Nchi za Ulaya zimekuwa zikiiunga mkono Ukraine baada ya uvamizi wa Urusi mnamo mwezi Februari,na Urusi imekatiza usambazaji wa gesi yake asili ya kimiminika ambayo inatumika katika mifumo ya kuleta joto majumbani,kuzalisha umeme pamoja na kundesha shughuli za kiviwanda. Ujerumani ni moja ya nchi ambazo haijapokea gesi ya aina yoyote kutoka Urusi tangu mwishoni mwa mwezi Agosti.

Mkuu mpya wa majeshi Pakistan aanza rasmi majukumu yake

Jenerali Asim Munir aliyeteuliwa mkuu mpya wa majeshi nchini Pakistan ameanza majukumu yake hii leo katika kipindi ambacho kinashuhudia ongezeko la mpasuko wa kisiasa kati ya serikali na kiongozi wa upinzani mwenye umaarufu Imran Khan.Khan aliyekuwa mchezaji wa Kriketi na kisha kuingia kwenye siasa na ambaye aliondolewa kwa madarakani kupitia kura ya kutokuwa na imani nae bungeni, amemtaka mkuu huyo mpya wa majeshi kuumaliza mkwamo wa kisiasa unaoendelea nchini humo. Aidha mkuu wa Majeshi Asim Munir anaanza majukumu yake kukiweko pia kitisho kipya kutoka kundi kubwa la wanamgambo ambalo limehusika kwa miaka 15 na msururu wa mashambulio ya umwagaji damu. Katika historia ya Pakistan jeshi lina usemi kwa kiasi kikubwa likiwa limeendesha utawala kwa kipindi cha zaidi ya miaka 30 katika historia ya miaka 75 ya nchi hiyo.Munir, aliyekuwa mkuu wa shughuli za ujasusi anachukua mahala pa jenerali Javed Bajwa aliyemaliza muda wake wa miaka sita.

Beijing ina mashaka na mawakili wakigeni katika kesi za watu wa Hong Kong

Kiongozi wa HongKong John Lee amesema serikali kuu mjini Beijing ina mashaka makubwa kuhusu suala la kuhusika kwa mawakili wa kigeni katika kesi ambazo zinagusa suala la usalama wa taifa. Kiongozi huyo jana aliliomba bunge la taifa la watu wa China ambalo ndio mamlaka ya mwisho kutowa uamuzi kuhusu ombi la HongKong la kutaka kuzuia mawakili wa kigeni kushughulika katika kesi zinazogusa suala la usalama wa taifa.Hatua hiyo inakuja baada ya mahakam ya juu katika mji huo wa HongKong kupitisha uamuzi kwamba wakili mmoja raia wa Uingereza anaweza kumuwakilisha bilionea Jimmy Lai aliyeko jela na ambaye ni mpiganiaji demokrasia. Kesi ya Lai itasikilizwa alhamisi. Kiongozi wa Hong Kong John Lee amewaambia waandishi habari leo kwamba anatarajia kamati kuu ya bunge la umma wa China NPC,kufanya maamuzi kuhusu suala hilo.