Viti 2005 përfundoi me një katastrofë për udhëheqjen siriane

Viti 2005 përfundoi me një katastrofë për udhëheqjen siriane. Parashenja për 12 muajt e ardhshëm për presidentin Bashar El Asad siç duket përbëhet nga pesë shkronja: KRIZË.

Gjithçka filloi me një intervistë të zëvendëspresidentit të deritanishëm sirian, Abdul Halim Çadam, të cilën kanali televiziv arab El Arabija e transmetoi një natë para ndërrimit të motmoteve. Çadam i cili aktualisht jeton në Paris gjatë intervistës ka ngritur akuza të rënda kundër presidentit sirian Bashar el Asad. Sipas Çadamit, Asadi e kishte kërcënuar ish-kryeministrin libanez, Rafik Hariri para vrasjes së tij në shkurt të vitit 2005.

Gjatë një takimi me të Asad pati sqaruar - citoj: 'unë do të shkatërroj secilin që do të provoj të pengoj vendimet tona'. Dhe vetëm pak muaj më vonë, saktësisht më 14 shkurt Hariri vritet. Po atë ditë u dëgjua zëra se pas vrasjes së tij mund të fshihet vetë udhëheqja siriane. Hariri i cili kohëve të fundit po shprehej hapur kundër pushtimit sirian të Libanit është hequr qafe nga kundërshtarët e tij.

Dy raporte jopërfundimtare të një komisioni hetimor të ngritur nga Kombet e Bashkuara, i cili drejtohet nga gjermani Detlev Mehlis çojnë në drejtim të njëjtë: është i mundur implikimi ndër të tjera i shërbimit të fshehtë sirian në atentat.

Në pyetjen se a është e mundur që presidenti Asad të mos ketë ditur asgjë për atentatin, Çadam sqaroi kategorikisht se asnjë shërbim i fshehtë sirian nuk mund të marrë vetë një vendim të tillë. Çadam duhet ta dijë: 73 vjeçari konsiderohet si shkaktar i politikës siriane ndaj Libanit para tërheqjes së trupave siriane nga vendi fqinj. Urdhëri për tërheqje u dha atëherë kur presioni ndërkombëtar u shtua shumë. Brenda dhe jashtë Libanit askush nuk donte ta pranonte më pushtimin sirian. Çadam ishte kundër tërheqjes por nuk mund të ndryshonte asgjë. Eshtë e mundur që ky ishte shkaku pse në qershor të vitit të kaluar ai kërkoi nga Asadi t'a liroj nga posti i zëvendëspresidentit. Një reagim publik për këtë lutje nuk është bërë asnjëherë në Damask.

Çadam gjatë intervistës së tij deklaroi se jep dorëheqjen nga posti i zëvendëspresidentit. Anëtarë të parlamentit sirian debatuan për deklaratat e tij dhe akuzuan atë për shkeljen e nderit të atdheut dhe popullit sirian. Kryetari i komitetit të kushtetutës në parlament e quajti Çadamin agjent të fshehtë andaj veprimet e tij duhet parë si komplot dhe krim kundër sigurisë së shtetit. Kështu parlamentarët kërkuan njëzëri që Çadami të akuzohet për tradhti të lartë ndaj shtetit. Ministri i drejtësisë tani duhet të ndërrmarrë hapat e nevojshëm, thuhet në rezolutë. Po ashtu të dielën mbrëma partia Baath e presidentit Asad përjashtoi nga radhët e partisë, Abdul Halim Çadamin.

Sido që të jetë regjimi sirian ka qenë rrallëherë muajve të kaluar kaq i dobët si sot. Dhe pas akuzave të Çadamit me siguri që do të shtohen kërkesat për ndërrimin e pushtetit në Damask. Apele të tilla janë dëgjuar shpesh të kaluarën nga Shtetet e Bashkuara të Amerikës.

Në këtë mënyrë viti 2006 mund të thuhet se për regjimin në Damaskë filloi me një krizë por 12 muajt është e mundur që bartin me vete edhe befasi të tjera.