Trazira në Paris prej gjashtë ditësh

Gurë nga ana e demonstrantëve - gaz lotësjellës nga policia. Gjashtë netë me radhë një valë dhune kaploi periferitë veriore të Parisit. Çdo gjë filloi të enjten e kaluar (28.10.) me vdekjen tragjike të dy të rinjve. Duke kujtuar se po i ndiqte policia ata u fshehën në një trafo ku i zuri korenti. Të martën, familjet e tyre u pritën nga kryeministri Dominik de Vilëpë (Dominique de Villepin) dhe ministri i brendshëm Nikolas Sarkosy (Nicolas Sarkozy) ku sqaruan rastin. Mirëpo, dhuna eskaloi. Natën e të së
mërkurës u goditën gati pesë departamente. Bilanci:mbi 30 arrestime, 150 zjarrvënje, si dyqane tepihësh, kontejner mbeturinash dhe mbi 60 makina.

Kritika duhet të bjerë sidomos mbi ministrin e brendshëm Sarkosy , i cili do të jetë për dy vjet president i shtetit francez. Në rininë e tij ai është sjellë në qarqe problemesh , çfarë edhe banorët e panë si provokim kur ai të rinjtë e rebeluar i quajti llum dhe
fundërrina. Në një intervistë ai mbajti këtë qëndrim: "Unë nuk shfrytëzoj fjalë të ashpra apo vullgare. Unë jam i edukuar mirë. Mirëpo, një qen do ta quaj-qen dhe vrasësin-vrasës. Dhe, nuk e di përse fjala fundërrinë duhet të jetë vullgare? Shtoj se të gjithë ata të cilët janë bashkëfajtor për gjendjen e periferive tona, nuk duhet të mbajnë leksione."

Këtë ministri i brendshëm francez e tha duke pasur parasysh kritikën nga radha e socialistëve opozitar. E megjithatë, problemet e banorëve mërgimtar në periferitë e goditura, mbesin kryesoret. Këtu mbretërojnë papunësia dhe ndjenja e të qenurit në burg. Bandat veprojnë. Tregtia e drogës lulëzon. Qeveria e ndjen se të 2000 policët shtesë në lagjet e djegura nuk mjaftojne për vënjen e serishme të rendit. Ministri i brendshëm Sarkosi ka anuluar një udhëtim jashtë shtetit. Kryeministri de Vilëpë poashtu ka anuluar një vizite, përkohësisht.

Anëtari i qeverisë Francois Goulard, me shenjat e para për një zgjidhje: "Ne duhet të jemi konsekuent dhe plot mirëkuptim. Të rreptë kundër bandave e mafias të cilët nuk janë të interesuar që të mbretrojë rendi. Ata kanë vënë rendin e tyre në periferi! Por, mirëkuptim duhet të kemi për popullin dhe për të rinjtë, të cilët i nënshtrohen kësaj situate".

Propozimet për reforma vinë prej të gjitha anëve. Ministri i brendshëm Sarkozy dëshiron përforcim masash parandaluese dhe me këtë do të ngarkojë kryetarët e
bashkive. Ata duhet të fillojnë me prandalimin e dhunës që në qerdhet e fëmijëve.
Por, ekspertët besojnë se të gjitha këto projekte ndikojnë vetëm në afat të gjatë dhe në ditët e ardhshme llogarisin në trazira të reja.