Thaçi: Ata që inicuan trazirat janë inicues të destabilitetit në Kosovë dhe të situatave të papranueshme!
18 Mars 2004Zhvillimet në Kosovë janë të dhimbshme, janë të rënda, por vlerësoj se do të ketë qetësim të situatës. Unë u shpreh ngushllime të gjithë familjarëve që humbën më të dashurit e tyre në këto protesta, gjithashtu u uroj shërim edhe të lënduarve. Besoj se këto ngjarje do të jenë një shembull, i cili do të kthente vëmendjen për të eleminuar shkaktarët e ngjarjeve të tilla dhe për t´i eleminuar ata shkaktarë që kjo të mos ndodh më. UNMIK-u duhet të jetë më aktiv në shpërbërjen e strukturave parlele serbe si burim të destabilitetit në Kosovë. Vlerësoj se strukturat paralele serbe dhe ata që kanë inicuar këto përplasje, thjesht janë inicues të destabilitetit të Kosovës dhe krijimit të situatave jo të pranueshme, as për qytetarët e Kosovës, as për ndërkombëtarët. Dhe, unë besoj se këto zhvillime nuk do të jenë ato që do ta shtynë zgjidhjen e statusit politik të Kosovës, sepse shqetësimi për zgjidhjen e statusit politik dhe zgjidhja përfundimtare e këtij statusi, nënkupton stabilitet, paqe, siguri dhe mirëqenie për të gjithë qytetarët!