Soren Jesen Petersen viziton Bujanovcin

"Liderët politikë në Beograd duhet të jenë shumë të kujdesshëm në deklarat e tyre dhe të mos prejudikojnë për rastet, para se të përfundojnë hetimet", tha Petersen, duke aluduar në incidentin e fundit që ndodhi me rrahjen brutale të një çifti bashkëshortor serb në Kosovë.

Këto komente shefi i UNMIK-ut i bërëi në një konferencë shtypi, në Bujanoc, pas vizitës që ia bëri dy kampeve të refugjatëve serbë dhe romë nga Kosova, në këtë qyetet:

"Erdha këtu sepse kthimi i personave të zhvendosur paraqet një çështje kyçe për përmbushjen e standardeve" tha Petersen. Ai theksoi se gjendja e sigurisë në Kosovë ka shënuar përparime të dukshme dhe se në këtë rast është i nevojshëm edhe angazhimi i autoriteteve serbe në Beograd që t'i bindin serbët për kthim në shtëpitë e tyre.

Kryeadministratori Petersen, tha se rifillimi i bisedimeve për çështjen e të zhdukurve dhe ato teknike, do të ndikojë në kthimin e refugjatëve dhe se në këtë aspekt premton ndihmën e faktorit ndërkombëtar. Nga ana tjetër, duke folur në konferencën e përbashkët për shtyp, shefi i sektorit për kthim në Qendrën Koordinuese serbe për Kosovën, Dragisha Dabetiq, ka theksuar se vetëm 3 për qind e refugjatëve janë të vendosur nëpër qendrat kolektive, ndërsa pjesa tjetër jeton në kushtë edhe më të vështira.

Shefi I UNMIK-ut, ka zhvilluar biseda edhe me prefektin e Bujanocit, Nagip Arifin, ku është diskutuar për personat e zhvendosur shqiptarë nga Lugina e Preshevës në Kosovë.

Vizita e sotme e kryeadministratorit për Kosovën, Soren Jesen Petersen, në Bujanoc, është përcjellë nën masa të rrepta sigurie.