1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Sa i përhapur është antisemitizmi?

4 Gusht 2019

Ndonëse refuzimi ndaj hebrejve nuk po përhapet më fort midis gjermanëve, shkruan SZ, antisemitizmi e tregon fytyrën e tij gjithnjë e më hapur.

https://p.dw.com/p/3NIVQ
Bonn: Tag der Kippa - Yitzhak Yohanan Melamed
Fotografi: picture-alliance/dpa/F. Gambarini

Antisemitizmi në Gjermani po shtohet, dëgjon të thuhet shpesh. Por a tregojnë shifrat se gjithnjë e më shumë njerëz në Gjermani kanë një qëndrim antisemitik, pyet gazeta Süddeutsche Zeitung (SZ) në një shkrim të premten (02.08.2019)? Dhe a është i lidhur antisemitizmi me një qëndrim ekstremist të krahut të djathtë?

Që nga viti 2001, Ministria e Brendshme e Gjermanisë publikon çdo vit në statistikat e policisë për numrin e veprave penale me motive antisemite dhe i ndan ato në kategori të caktuara të autorëve. Kështu, sipas ministrisë, në 2018 ka pasur gjithsej 1799 akte antisemite.

Në vitin 2014 kishte rreth 1.600 raste, ndërsa në vitin 2006 më shumë se 1.800. Që nga viti 2001, ka pasur mesatarisht rreth katër akte në ditë. Në mënyrë të ngjashme luhatet numri i akteve të dhunës: midis 28 dhe 64 raste në vit janë raportuar që nga viti 2001. Në vitin 2018 ka pasur 37 raste.

Numër i lartë krimesh të paraportuara

Sidoqoftë, ekspertët supozojnë se ekziston një numër i madh rastesh të paraportuara. Për shembull, një studim i Agjencisë së Bashkimit Evropian për të Drejtat Themelore (FRA) mbi antisemitizmin në shtetet e BE  tregoi që në 2013, se në pesë vitet paraprijëse vetëm 28 përqind e hebrejve që kishin qenë viktima ngacmimi të rëndë antisemit e kishin raportuar këtë në polici ose te ndonjë organizatë tjetër. Prandaj, numri aktual i veprave të tilla penale mund të jetë më shumë se tri herë më i lartë.

Edhe raportet e incidenteve antisemite në Berlin, të cilat i mbledh që prej vitit 2015 "Qendra e Kërkimit dhe e Informacionit Antisemitizmi" (RIAS) e Shoqatës për Kulturë Demokratike në Berlin tregojnë një numër të madh të rasteve të paraportuara. Në vitin 2016, u llogaritën 470 incidente, krahasuar me 951 në 2017 dhe 1083 në 2018. Më dendur RIAS regjistron "sjellje fyese" - d.m.th. sjellje të qëllimshme dashakeqe ose diskriminuese, edhe pa stereotipe antisemite.

Numri i akteve antisemite është pra i lartë, dhe ka dukshëm më shumë raste sesa tregojnë statistikat e policisë. Sidoqoftë, rritja e tanishme nuk duhet të jetë patjetër një fenomen afatgjatë dhe i qëndrueshëm. Statistikat mund të përdoret të paktën si sinjal: në vitet 2002 dhe 2006, shifrat e incidenteve këtu ishin më të mëdha. 

Por aktualisht, sipas SZ, ekziston një gatishmëri në rritje për t'i shprehur hapur qëndrimet antisemitike në internet, veçanërisht në mediat sociale. "Antisemitizmi ekzistues është bërë më i dukshëm në nivelin e qëndrimit," vëren edhe politologu i Berlinit, Samuel Salzborn. Qëndrimet agresive, i thotë ai SZ, pasohen nga krime, sulme fizike, propagandë dhe fyerje.