Parlamenti Evropian synon një politikë të përbashkët për refugjatët | Evropa | DW | 27.09.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Evropa

Parlamenti Evropian synon një politikë të përbashkët për refugjatët

Parlamenti Evropian dhe Komisioni i BE-së debatuan të mërkurën (27.09) në Strazburg mbi politikën për refugjatët dhe luftën e përbashkët kundër terrorizmit në Evropë. Në politikën për refugjatët në radhë të parë synohet të ndalet vala e refugjatëve në brigjet e Mesdheut dhe në ishujt Kanare.

Refugjatë që zbarkojnë në ishujt Kanare

Refugjatë që zbarkojnë në ishujt Kanare

Një unanimitet i rrallë u konstatua të mërkurën në Parlamentin Evropian në Strazburg. Në çështjen e refugjatëve eurodeputetët, Komisioni i Brukselit dhe kryesia finlandeze e BE-së janë të një mendimi. Motoja e tyre është: më shumë Evropë në vend të copëzimit. Komisioneri i BE-së për drejtësinë Franko Fratini:
"Ta them krejt hapur: ne s´duhet ta pranojmë, që shoqëria prej kohësh është shumë më përpara se ne me strategjitë tona politike."

Me fjalë të ngjashme u përpoq të bindë për strategjinë e tij edhe Komisioneri italian i Drejtësisë në takimin e javës së kaluar me ministrat e drejtësisë dhe të brendshëm të vendeve të BE-së, por pa sukses. Gjermanët, por edhe francezët insistojnë, që vazhdojnë të veprojnë me përgjegjësinë e vet për politikën e emigracionit. Thënë shkurt: Evropa duhet të kujdeset për kufij të sigurtë me synimin që ta pengojë valën e refugjatëve.

Edhe për migracionin legal vendet antare duan të vazhdojnë të kujdesen vet. Argumenti i tyre është: se nevojat e tregut të punës janë të ndryshme në vende të ndryshme. Shefi i grupit paralmentar të socialdemokratëve evropianë, Martin Shulc, e konsideron të gabuar veprimin e mëvetsishëm: "Vala e migracionit, që përshkruajmë ne këtu, në brigjet jugore të Evropës nuk mund të zgjidhet vetëm dhe në mënyrë restriktive. Për këtë nevojitet një qëndrim i kombinuar mes luftës kundër kriminalitetit të organizuar, legalizimit të emigracionit dhe koordinimit të politikës së integrimit."

Shulc ashtu si edhe refentët e tjerë pas tij kritikuan faktin, që vitet e shkuara nuk është bërë shumë në drejtim të një politike të përbashkët për punët e brendëshme dhe drejtësinë. Përse ka kaq shumë pengesa kjo bëhet e qartë në shemubllin e politikës për refugjatët. Heqja dorë prej sovranitetit kombëtar do të thotë që të shkëputesh prej traditave të preferuara.

Eurodeputetja kristiandemokrate Eva Klamt bën të qartë, se ajo nuk e vlerëson qëndrimin e Spanjës lidhur me çështjen e migracionit. T´u japësh nënshtetësi më shumë se një gjysmë milioni emigrantëve ilegalë dhe më pas të befasohesh prej valës së mëtejshme të refugjatëve, kjo nuk shkon: "Nuk mundesh që nga njëra anë pa informacion, pa rënë dakord të ndërmarësh legalizimin masiv të refugjatëve dhe nga ana tjetër, kur këto masa kanë efektin e joshjes të kërkosh ndihmë prej BE-së."

Kemi të bëjmë me një grindje parimore, që po buçet tashmë në radhët e ministrave të brendshëm evropianë: dëbimi me konseguencë kundër legalizimit të shpejtë. Përderisa një kontradiktë e tillë nuk mund të zgjidhet shpejt, komisioneri i BE-së për drejtësinë Franko Fratini, bën thirrje për interesin e përbashkët që është kufij të jashtëm më të sigurtë: "Solidaritet do të thotë, t´u ndihmosh vendeve që ndodhen nën presion."

Konkretisht kjo do të thotë: anije, helikopterë dhe avionë duhet të vihen në dispozicion që të mund të kontrollohen ujrat përpara brigjeve jugore. Vendimin përkatës Fratini do ta marrë në takimin e ardhshëm të ministrave të brendshëm të BE-së. Kjo do të ish në një farë mënyre një zgjidhje e vogël fillestare.

  • Data 27.09.2006
  • Autor Peter Heibruner
  • Shtypni Shtypeni faqen
  • Permalink https://p.dw.com/p/ArA5
  • Data 27.09.2006
  • Autor Peter Heibruner
  • Shtypni Shtypeni faqen
  • Permalink https://p.dw.com/p/ArA5