Pakti atlantikoverior nuk është klub që miraton çdo propozim të Uashingtonit

Në Berliner Zeitung lexojmë:

'Parimisht është e drejtë: Moska nuk lejohet të ketë të drejtë vetoje në zgjerimin e aleancës. Por kjo nuk do të thotë që aleanca të mos e përfillë aspak. Rusia është një partner i vështirë, është autoritare dhe e pallogaritshme. Megjithatë Evropa duhet ta përfshijë Rusinë sa më shumë të jetë e mundur. Evropa dhe Rusia ia kanë nevojën njëra-tjetrës. Prandaj Evropa duhet t'u kushtojë interesave të veta në kontinent më shumë rëndësi sesa atyre amerikane. Këtë e bëri në Bukuresht.'

Ndërsa Frankfurter Rundschau përmban këtë opinion:

'Pakti i atlantikoverior tregoi se nuk është klub që miraton me tundje koke propozimet e Uashingtonit. Ja që ka arsye të forta që dy republikat sovjetike të pranohen në një kohë më të vonët. Në aspektin e politikës së brendshme ato nuk janë ende gati. Në planin e politikës së sigurimit do të kishte qenë sinjali i gabuar në drejtim të Moskës. Por ky fitim etape prej Evropës kthehet në sukses kur të arrihet zgjidhja e kompleksit të problemeve, i cili qëndron tek mburoja kundërraketore amerikane dhe tek marrëveshja mbi forcat e armatosura konvencionale në Evropë, e pezulluar prej Moskës. Ndihmë do të ishte një strategji e përgjithshme e politikës së sigurimit për NATO-n. Këtu ka merita kancelarja Angela Merkel. Sipas saj, ky koncept nuk duhet të kufizohet në çështje ushtarake, por duhet të çojë në një NATO që ruan paqen.'