Mision faktmbledhës i ODIHR-it në Tiranë për reformën zgjedhore
13 Shkurt 2008Si është ecur deri më tani me realizimin e reformës zgjedhore? Si do të kapërcehen cështjet më delikate, që kanë shkaktuar debat mes politikanëve në Tiranë? Pikërisht përgjigjen e këtyre dy pyetjeve kryesore po tenton të marrë në Shqipëri, nje ekip zyrtar nga ODIHR-i, i cili nga mesdita e së mërkurës (13.02)nisi kontaktet me politikanë të të gjithë spektrit, përfaqësues të organizatave joqeveritare dhe diplomatë përendimorë. Në takime të veçanta dhe jashtë vëmendjes së medias ekipi po mban shënime mbi pikpamjet e palëve për sistemin zgjedhor më të përshtatshëm për kushtet e vendit, për mënyrën e ndërtimit të komisioneve të votimit në qëndër dhe në bazë, për masën e pragut të lëjuar që një forcë politike duhet të ketë pjesmarrje në parlament etj.
Misioni faktmbledhës i ODIHR-it ndodhet në Tiranë në një moment kur partitë e vogla parlamentare nga njëra anë dhe dy partitë kryesore PD dhe PS janë të acaruara, për shkak të mënyrës se si po ndërtohet ligji i ri elektoral. Por misioni i zyrtarëve të ODIHR-it ka dhe një rëndësi tjetër: Raporti që do të përgatitet në zyrat qendrore të organizatës në Vjenë, do të jetë thelbi i prezantimit për punën, që ka bërë Shqipëria për reformën zgjedhore gjatë punimeve të Samitit të Bukureshtit të NATO-s, ku Tirana zyrtare pret të marrë një ftesë për anëtarësimin në Aleancën Veriatlantike.