Ministri i jashtëm rus Sergej Lavrov vizitoi Berlinin | Gjermania | DW | 06.04.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Ministri i jashtëm rus Sergej Lavrov vizitoi Berlinin

Ministri i jashtëm rus Sergej Lavrov u takua dje dhe sot në Berlin me kancelaren gjermane Angela Merkel, shefin e diplomacisë gjermane Frank Valter-Stajnmajer dhe ministrin e mbrojtjes Franc Jozef Jung. Tema qendrore të bisedimeve ishin grindjet për programin bërthamor iranian dhe gjendja në Bjellorusi

Merkel dhe Lavrov në Berlin

Merkel dhe Lavrov në Berlin

Marrëdhëniet në mes të Moskës dhe Berlinit janë komplikuar nën drejtimin e kabinetit qeveritar nga Angela Merkel. Edhe pse kjo nuk vërehej në terminin për fotografim të përbashkët me ministrin e jashtëm rus, mbështetja ruse për diktatorin bjellorus Aleksander Lukashenko shihet me sy kritik nga Merkel dhe qeveria e saj. Këtë ia tha më parë Lavrovit edhe homologu i tij gjerman Frank Valter Stajnmajer. Sergej Lavrov nga ana tjetër i vendosi në një rrafsh Bjellorusinë dhe Ukrainën:

"Rezultatet e zgjedhjeve të fundit në Bjellorusi dhe në Ukrainë tregojnë vullnetin e popullit në këto vende sovrane. Kombet tjera duhet të respektojnë rezultatin e këtyre zgjedhjeve dhe t'i shohin ato si bazë për marrëdhëniet e tyre me Minskun dhe Kievin. Gjithçka është mirë përderisa do të respektohet parimi i mospërzierjes në çështjet e brendshme të kombeve tjera", tha Lavrov.

Stajnmajer kundërshtoi hapur mysafirin nga Moska duke theksuar, se në bazë të parimeve themelore të Organizatës për Siguri e Bashkëpunim në Evropë, në çështjet e të drejtave të njeriut dhe demokracisë nuk ekzistojnë përzierje në çështjet e brendshme.

"Nga njëra anë ne kemi lënë pas zgjedhjet në Ukrainë të cilat janë zhvilluar sipas normave ndërkombëtare të njohura si norma të OSBE-së, dhe kemi vlerësimet për zgjedhjet në Bjellorusi për të cilat nuk mund të thuhet një gjë e tillë. Andaj për dallim nga kolegu Lavrov ne tërheqim vëmendjen se shqetësimi ynë i shprehur, nuk është përzierje në çështjet e brendshme të Bjellorusisë", tha Stajnmajer.

Nga ana tjetër bashkëbiseduesit ishin të një mendje sa i përket programit bërthamor iranian. Me mbështetjen e Rusisë Këshilli i Sigurimit i Kombeve të Bashkuara ka miratuar para ca ditësh një deklaratë përmes së cilës nga Irani kërkohet bashkëpunimi i menjëhershëm me bashkësinë ndërkombëtare.

"Ne kemi konkluduar bashkarisht se, tani ndodhet në duart e Iranit që të reagoj konform deklaratës së presidencës dhe të dërgoj tek ne një sinjal që do të përmbante aftësitë e durueshme të cilat do të na lejonin të riktheheshim në procesin e negociatave", tha Stajnmajer.

Ndërkaq në bisedë me ministrin gjerman të mbrojtjes Jung është biseduar për interesat e përbashkëta të sigurisë. Lavrov:

"Ne kemi diskutuar për mundësinë e përmirësimit të marrëdhënieve gjermano-ruse për stabilizimin e gjendjes në Afganistan. E njëjta vlen edhe për përpjekjet e përbashkëta për gjetjen e një zgjidhje të konfliktit mbi programin bërthamor iranian", tha Lavrov.


  • Data 06.04.2006
  • Autor Peter Stytcle
  • Shtypni Shtypeni faqen
  • Permalink https://p.dw.com/p/Ar0u
  • Data 06.04.2006
  • Autor Peter Stytcle
  • Shtypni Shtypeni faqen
  • Permalink https://p.dw.com/p/Ar0u