Lufta në Irak nuk mund të fitohet më! | Bota | DW | 22.10.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Bota

Lufta në Irak nuk mund të fitohet më!

Ekspertët në SHBA kërkojnë ndryshim strategjie

Tetor i përgjakshëm për forcat amerikane në Irak

Tetor i përgjakshëm për forcat amerikane në Irak

Përballë shkallëzimit të mëtejshëm të dhunës në Irak gjithnjë e më shumë ekspertë amerikanë i këshillojnë qeverisë së vendit ndërrimin e strategjisë në Irak. Shtëpia e Bardhë vazhdon të mos shprehet, por synimi për një Irak të bashkuar, në paqe, demokratik dhe miqësor ndaj Amerikës nuk duket më i arritshëm. Gjithë opsionet që i mbeten presidentit George W. Bush janë pa përjashtim problematike.

Tetori po kthehet në muajin më të përgjakshëm për forcat amerikane në Irak që prej marshimit në pranverën e vitit 2003. Të enjten një zëdhënës ushtarak pranoi dështimin e operacionit "Përpara së bashku", me anë të të cilit forcat irakiane dhe amerikane të sigurisë u përpoqë të kufizonin dhunën në kryeqytetin Bagdad. Të premten agjencitë e lajmeve njoftuan marrjen përkohësisht prej milicisë shiite Sadr të qytetit Amara në jug të vendit.

Në Uashington po kthjellohet tashmë edhe Partia Republikane e Bushit. Senatoren për Teksasin, Kay Hutchison: "Gjërat nuk po shkojnë ashtu siç do të donim, pra duhet të prodhojmë ide të reja. Për këtë qëllim janë udhëheqësit politikë."

Ekspertë si ish-këshilltari i qeverisë Bush në ministrinë e jashtme amerikane Richard Haas kërkojnë publikisht ndryshimin e strategjisë: "Lufta në Irak nuk mund të fitohet më, në rast se fjalës fitore i jepet kuptimi i vërtetë. SHBA duhet të kërkojnë rrugë për kufizimin e humbjeve dhe të kostos. Ndërkohë në pjesë të tjera të rajonit duhet të kërkohen mundësi për arritje progresi dhe për kufizimin e pasojave negative prej gjendjes në Irak."

Në Shtëpinë e Bardhë është caktuar një komision për Irakun, të cilin e drejton James Baker, ish-ministri i jashtëm nën presidentin e parë Bush. Siç kuptohet, komisioni do të propozojë pas zgjedhjeve të nëntorit për kongresin që në zgjidhjen e problemit të Irakut të përfshihen më shumë vendet fqinje, mes tyre edhe shtetet fqinje Iran dhe Siri si dhe konflikti palestinezo-izraelit.

Senatorja Hutchison angazhohet për ndarjen e Irakut në veriun kurd, jugun shiit dhe qendrën sunite. Senatorë të tjerë si John McCain, i cili sipas të gjitha gjasave do të kandidojë si pasues i Bushit për Partinë Republikane pas dy vjetësh, kërkojnë dërgimin e trupave shtesë; por ushtria amerikane ka mbërritur që tani në kufirin e kapaciteteve të veta.

Të tjerë, para së gjithash nga Partia Demokratike, kërkojnë një tërheqje me faza të trupave amerikane nga Iraku, gjë që Shtëpia e Bardhë e kundërshton ende.

Vëzhguesit nuk llogarisin me ndryshim strategjie nga qeveria amerikane përpara zgjedhjeve të 7 nëntorit për kongresin. Por pas kësaj date gjithçka është në dispozicion.

  • Data 22.10.2006
  • Autor Daniel Scheschkewitz
  • Shtypni Shtypeni faqen
  • Permalink https://p.dw.com/p/ArKD
  • Data 22.10.2006
  • Autor Daniel Scheschkewitz
  • Shtypni Shtypeni faqen
  • Permalink https://p.dw.com/p/ArKD
Reklamë