Lascheti pranon gabime në librin e tij | Gjermania | DW | 30.07.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Reklamë

Gjermania

Lascheti pranon gabime në librin e tij

Kandidati unionist për kancelar kërkon falje për një burim të papërmendur në librin e tij. Bëhet fjalë për katër fjali jo të plota në tekst.

Kryetari i CDU-së dhe kandidati konservator për kancelar Laschet ka pranuar gabime citimi në librin e tij "Republika në rritje - Imigrimi si shans".

Armin Laschet i tha Agjencisë Gjermane të Lajmeve dpa se në materialin e përdorur në librin e tij "Republika në rritje - Imigrimi si shans" nuk përmendet të paktën një autor, as në tekst, as në listën e burimeve. Ai do të organizojë një verifikim të librit të tij të botuar në vitin 2009 për të parë nëse ka ndonjë gabim tjetër. Kryeministri i landit federal të Rinit Verior-Vestfalisë kërkoi falje.

Më parë, në Twitter qe bërë publik se ka paralele midis një paragrafi të librit të Laschetit dhe një publikimi tjetër.

Në libër, kryeministri i sotëm i Rinit Verior-Vestfalisë bën thirrje për një "bashkim të tretë gjerman", në të cilin, pas integrimit të të dëbuarve (gjermanë) dhe ribashkimit pritet të ndodhë integrimi i migrantëve.

Bëhet fjalë për pak fjali dhe pjesë fjalish në librin e Laschetit, që duken mjaft të ngjashme me fragmente të një ligjëratë shkencore të korrikut 2008, të një politologu. Tre fjali dhe pjesë të tjera të tyre mund të lexohen fjalë për fjalë në librin e Laschetit, në faqet 260 dhe 261.

Në fillim të muajit, kandidatja e Të Gjelbërve për kancelare, Annalena Baerbock, pranoi gabime në lidhje me kritikat për plagjiaturë kundër saj.