Ante Gotovina arrin në Hollandë | Politika | DW | 10.12.2005
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Politika

Ante Gotovina arrin në Hollandë

Spanja dorëzoi në Hagë ish gjeneralin kroat Ante Gotovina, i cili kërkohej që prej vitit 2001. Të shtunën Gotovina u fut në burgun e Kombeve të Bashkuara Sheveningen. Ai akuzohet ndër të tjera për vrasjen e 150 serbëve gjatë luftës së kroatëve për pavarësi.

Ish gjenerali kroat Ante Gotovina

Ish gjenerali kroat Ante Gotovina

Qindra gazetarë ishin mbledhur që në orët e para të mëngjesit të së shtunës përpara burgut të Shevingenit. Të gjithë prisnin arritjen e ish gjeneralit kroat Gotovina. Kur më në fund arriti makina e blinduar me të arrestuarin Gotovina, gjithçka ndodhi shumë shpejt. Pas një breshërie me fotografi, forcat e policisë u zhdukën së bashku me Gotovinën pas portës së burgut.

Tani ish gjenerali kroat do të presë në qelinë e tij fillimin e procesit gjyqësor. Të hënën ai do të paraqitet përpara trupit gjykues. Prokuroria e përgjithshme e akuzon 50 vjeçarin për vrasje, përndjekje, dëbim të civilistëve si edhe shkatërrim dhe plaçkitje në qindra qytete dhe fshatëra.

Gotovina, i cili vlerësohet si hero në atdheun e tij, ishte komandanti i njësive kroate, të cilat sulmuan në verë të viti 1995 provincën e Krajinës. Gjatë këtij aksioni u vranë të paktën 150 serbë dhe u dëbuan nga shtëpite e tyre mbi 150.000 njerëz. Sidomos gra, fëmijë dhe pleq që nuk pranuan të largohen nga shtëpitë e tyre, nuk e mbijetuan aksion e quajtur "Rrufeja".

Emrat e viktimave të identifikuara, qëndrojnë në listën e prokurorisë. Ndër ta ndodhet edhe 90 vjeçarja Maria Grubor, e cila u dogj e gjallë më 25 gusht 1995 dhe fqinji i saj 80 vjeçar Milloc, i cili u pushkatua po atë ditë. Sipas prokurorisë, shumica e viktimave u torturuan dhe keqtrajtuan përpara se të pushkatoheshin.

Qëllimi i aksionit "Rrufeja" ishte sipas prokurorisë së Hagës, dëbimi sistematik i të gjithë serbëve nga rajoni i Krajinës. Djegja e mbi 10.000 shtëpive e dëshmon këtë fakt. Gazetarë të huaj që e vizituan Krajinën pas ofensivës kroate, treguan se ky rajon ishte kthyer në një shkretëtirë të plotë.


Që pas shpalljes së akuzës përpara 4 vitesh, Ante Gotovina ishtë një ndër kriminelët më të kërkuar të luftës nga Tribunali i Hagës. Ndërkohë në atdheun e tij, Gotovina mbahet si një patriot i guximshëm dhe hero. Ish presidenti kroat Tuxhman, i cili është sipas Tribunalit të Hagës gjithashtu kriminel lufte, e mbrojti deri në fund ish gjeneralin Gotovina. Vetëm pas vdekjes së tij, u shua edhe ylli i gjeneralit Gotovina.

Ante Gotovina u arrestua të mërkurën e kaluar në Tenerifa. Një avion ushtarak spanjoll e solli atë të shtunën në Hollandë. Sidoqoftë procesi gjyqësor nuk pritet të fillojë përpara disa muajsh.

  • Data 10.12.2005
  • Autor Ludger Kazmierczak
  • Shtypni Shtypeni faqen
  • Permalink https://p.dw.com/p/Aqrv
  • Data 10.12.2005
  • Autor Ludger Kazmierczak
  • Shtypni Shtypeni faqen
  • Permalink https://p.dw.com/p/Aqrv