У Польшчы ўведзеныя новыя правілы транзіта
Новыя правілы былі прынятыя яшчэ 12 жніўня, аднак, пасля пратэстаў расійскіх дыпламатаў Варшава была вымушаная іх часова замарозіць. Калі раней турысты мелі права знаходзіцца на тэрыторыі краіны 3 дні да моманту пачатку дзеяння шэнгенскай візы і столькі ж пасля яе заканчэння, то цяпер жа - толькі на перыяд дзейнасці візы. Новаўвядзенне суправаджалася вялікім скандалам з расійскімі турыстамі. У сярэдзіне жніўня некалькі аўтобусаў з імі былі заблакаваныя на польска-нямецкай і польска-беларускай межах. Паколькі тэрмін шэнгенскай візы ў кагосці з турыстаў ужо выйшаў, а ў кагосці яшчэ і не пачынаўся, так сталася, што права ехаць транзітам праз Польшчу ў іх не было.
Трэба адзначыць, што новаўвядзенні польскага боку зусім не прадыктаваныя жаданнем ускладніць жыццё краінам-суседкам. Так ці інакш, Польшча, як сябра Еўразвязу, вымушаная прытрымлівацца пэўных правілаў візавай палітыкі. Нагадаю, што ў наступным годзе Варшава плануе вайсці ў шэнгенскую зону, а гэта азначае, што польскія візы для беларусаў значна падаражэюць. У звязку з гэтым, шэраг польскіх палітыкаў выступілі з прапановай увогуле зрабіць для беларусаў польскія візы бясплатнымі. Як адрэагуе на гэты заклік польскі ўрад - пакуль невядома.
Беларускія дыпламаты асаблівых праблемаў у новых правілах транзіту праз Польшчу для беларускіх грамадзянаў не бачаць. Якіх-небудзь складанасцяў ці канфліктаў, выкліканых гэтым, на беларуска-польскай мяжы пакуль заўважана не было. Пра гэта "Нямецкай хвалі" паведаміў прэс-сакратар беларускай дыпмісіі ў Варшаве Зміцер Выбарны.
Каб пазбегнуць якіхсці складанасцяў у будучыні, МЗС Польшчы накіраваў у амбасады краінаў-сябраў Еўразвязу ноты з просьбай арганізаваць працэс выдачы візаў такім чынам, каб грамадзяне Расіі, Украіны і Беларусі змаглі скарыстацца (у адпаведнасці з двубаковымі пагадненнямі і рашэннем Еўрапарламенту і Рады Еўропы) правам на бязвізавы транзіт.