На Магілёўскім аўтазаводзе парушаюць правы незалежных прафсаюзаў

Прадстаўнікі адміністрацыі Магілёўскага аўтазаводу ўзмацнілі пераслед актывістаў філіі незалежнага прафсаюзу радыёэлектроннай прамысловасці. Яны патрабуюць, каб рабочыя перайшлі ў дзяржаўны прафсаюз. Як сцвярджаюць прафсаюзныя актывісты, іх выклікалі да начальнікаў цэхаў і распавядалі пра перавагі, якія яны атрымаюць пры ўступленні ў дзяржаўны прафсаюз. Намеснік дырэктара прадпрыемства па ідэалогіі падрыхтаваў ліст, паводле якога прадстаўнікі адміністрацыі мусяць “правесці тлумачальную працу дзеля прыцягвання працаўнікоў у заводзкі прафсаюз”. Да ліста прыкладзены спіс працаўнікоў, куды патрапілі некалькі дзесяткаў сяброў незалежнага прафсаюзу. Першапачаткова рабочым казалі пра перавагі, а потым сталі наўпрост запалохваць: нібыта іх не перавядуць на працу ў Беларускі аўтамабільны завод, якому падпарадкоўваецца магілёўскі аўтазавод.