په آلمان کې د کډوالو پر ضد مظاهرې شوې دي
۱۳۹۴ مهر ۲۱, سهشنبه
د اروپايي ټولنې د اسلامي کیدو ضد دغه ډله یا پګیدا د انګلا میرکل د هغو سیاستونو خلاف ده چې د کډوالو په برخه کې یې خپل کړي دي.
د دوشنبې په ورځ ناوخته په دریسدن ښار کې شاوخوا ۹۰۰۰ کسانو د کډوالو ضد شعارونه ورکول. پولیسو همداراز ویلي دي چې په چیمنیتز او لیپزیګ ښارونو کې هم وړوکې مظاهرې رامنځته شوې.
په دریسدن کې په عین حال کې د پګیدا شاوخوا ۲۵۰ تنو مخالفینو د هغوی پر ضد مظاهرې وکړې او د هغوی پر ضد یې شعارونه ورکړل. خو پولیسو بیا دغه دوه ډلې له یو بل څخه بیلې وساتلې. د مظاهرې په جریان کې د پګیدا یو غړی د پولیسو له خوا ونیول شو.
د پګیدا د یوه بل غړي پر وړاندې کیدای شي چې د پولیسو له خوا تورونه ولګول شي. ځکه هغه له ځان سره د دار دوه حلقې لیږدولې چې ورباندې د آلمان د صدراعظمې انګلا میرکل او د دغه هیواد د اقتصاد د وزیر زیګمار ګبریل، نومونه لیکل شوي وو. د پولیسو یوه ویاند ویلي دي چې د دغه کس پر وړاندې د هغه قانون له مخې تورونه لګول کیږي چې په آلمان کې وګړو ته د مرګ ګواښ ورکول منع کوي. په دې اړه به د سه شنبې په ورځ پریکړه وشي.
تیره اوونۍ یوې نظر پوښتنې وښوله چې د میرکل له ګوند څخه په آلمان کې ملاتړ مخ په کمیدو دی دا په داسې حال کې ده چې آلمان ته د رسیدونکو کډوالو شمیر ورځ تر بلې مخ په ډیریدو دی. ویل کیږي چې په روان کال کې به دغه هیواد ته د ۸۰۰ زرو او یو میلیون په منځ کې کډوال ورسیږي.