نن په تاریخ کې
۱۳۹۰ دی ۱۸, یکشنبه
په تاریخ کې د نن ورځ مهمې پیښې:
د ۱۶۵۴م کال پر نن ورځ اوکراین، د روسیې سره یو ځای شو.
د ۱۹۱۲م کال پر همدې ورځ په بلومفونتن کې د افریقا د ملي کانګرې بنیاد کیښودل شو.
د ۱۹۲۶م کال پر همدغه ورځ ابن سعود د حجاز څخه د پاچا حسین تر شړل کیدو وروسته پاچا شو او د د هیواد نوم یې سعودي عربستان کیښود.
د ۱۹۷۲م کال د جنورې د میاشتې په اتمه بنګله دیشي سیاستوال، شیخ مجیب الرحمان، په پاکستان کې د بند را خلاصیدو څخه وروسته لندن ته ورسید او د خپل نوي هیواد په رسمیت پیژندلو غوښتنه یې وکړه.
د ۱۹۷۳م کال پر همدې ورځ په پاریس کې د امریکا او ویتنام تر منځ د سولې پټې خبرې اترې یو ځل بیا پیل شوې.
د ۱۹۹۲م کال پر نن ورځ په ټوکیو کې په یوه رسمي میلمستیا کې د امریکا د هغه وخت ولسمشر، جورج بش، پر ځمکه رالوید. سپینې ماڼې وویل چې هغه د معدې ناروغي لرله.
د ۱۹۹۶م کال پر همدغه ورځ د کانګو په کینساشا کې یوه مسافر وړونکي الوتکه د ګڼې ګوڼي په یوه سیمه کې راولویده. د دولتي ارقامو له مخې په دغه پیښه کې ۲۵۰ تنه ووژل شو خو د غیر رسمي ارقامو له مخې دغه شمیر بیا ۱۰۰۰ تنو ته رسیده.
د ۲۰۰۶م کال د جنوري پر ۸ په عراق کې د بیلک هاک نومي څرخي الوتکه راولویده او په کې سپاره ټول ۱۲ امریکاي سرتیري ووژل شول.
د ۲۰۱۰م کال پر همدې ورځ د امریکا د پوځ مشرانو وویل چې د امریکا متحده ایالات داسې کوم پلان نه لري چې یمن ته خپل پوځونه واستوي.
آژانسونه/ سید ریاض
کتونکی: نجیب الله زیارمل