لنډ خبرونه په متن او انځور کې
له آلمان څخه اخراج شوي افغانان کابل ته رسيدلي، په نړۍ کې د ترهگریزو پېښو د قربانيانو شمير ټيټ شوی، ميرکل يو وار بيا د نړۍ د ځواکمنې ښځې په توگه نومول شوې......
ميرکل يو وار بيا د نړۍ د ځواکمنې ميرمن په توګه نومول شوې
د «فوربس» په نامه امريکايي مجلې د آلمان صدراعظمه انگلا ميرکل د اتم وار له پاره سږ کال هم د نړۍ د تر ټولو ځواکمني ښځې په توگه نومولې ده. مجلې ليکلي چې خلک لا اوس پوښتنه کوي چې کله چې نوموړې نوره صدراعظمه نه وي نو څوک به ځای ناستی وي او د آلمان او نړۍ وضعه به څرنگه وي؟ دويم مقام د ۲۰۱۷م کال په څير د برېتانيا لومړۍ وزیري تیريسا می او دريم مقام د نړيوال وجهي صندوق مشرې کرستين لاگارد خپل کړی دی.
«له ايرانه ۷۰۰ زره زيات افغانان بیرته خپل هېواد ته ستانه شوي»
د رويترز خبري آژانس په حواله په ایران کې د اقتصادي وضعې د خرابيدو له وجې په روان ميلادي کال کې تر۷۰۰زره زيات بې اسنادو افغانان بيرته خپل هېواد ته ستانه شوي دي. د مهاجرت د نړيوال سازمان رپوټ چې د دسمبر تر لومړۍ نيټې پورې شميرې پکښې راټولې شوي دي، ښيي چې په ټولیزه توگه ۷۵۲۳۲۵ افغانان له ایران او پاکستان څخه ستانه شوي چې په دې کې ۷۲۱۶۳۳ هغه دي چې له ايران څخه بيرته خپل هېواد ته تللي دي.
له آلمان څخه اخراج شوي کډوال کابل ته رسيدلي
له آلمان څخه ۱۴ اخراج شوي افغان مهاجر کابل ته رسيدلي دي. د آلمان د کورنیو چارو وزارت ويلي دي چې له دوی څخه زياتره هغه مهاجر ول چې د آلمان په بايرن ايالت کې رد شوي ول. د وزارت په حواله له دوی څخه یې ۹ تنه هغه ول چې په سترو جرمونو کې د لاس درلودو له کبله په جزا محکوم شوي ول. خو دا په ډاگه شوې نه ده چې څه ډول جرمونه ول.
عمران خان: په افغانستان کې سوله د پاکستان په گټه ده
د پاکستان لومړي وزیر عمران خان د افغانستان د سولې له پاره د امريکا ځانگړي استازي زلمي خلیلزاد ته ويلي دي چې په افغانستان کې سوله د پاکستان په ګته ده، خو هغه دا ژمنه و نه کړه چې طالبان به د سولې د خبرو میز ته راولي. عمران خان او خليزاد د چهار شنبې په ورځ په اسلام آباد کې سره وليدل.
په نړۍ کې د ترهگرۍ قربانيانو شمير راټيټ شوی
په ټوله نړۍ کې د ترهگرۍ د قربانيانو شمير ډېر کم شوی دی. د اقتصاد او سولې د انستيتويت د ترهگرۍ د نړيوال شاخص په حواله په ۲۰۱۷م کال کې د بريدونو پر وخت ۱۸۸۱۴ انسانان وژل شوي چې په دې ترتيب تر ۲۰۱۶م کال څخه ۲۷ سلنه لږ دي. د ۲۰۱۴م کال په پرتله د قربانيانو شمير حتی ۴۴ فيصده لږ شوی دی. په ځانگړي ډول په سوريه او عراق کې د ترهګري ډلې داعش د ناکامۍ له کبله وضعيت ښه شوی دی.
د اېتاليا د يوې مافيايي ډلې۹۰ غړي نيول شوي دي
د آلمان، ايټاليا، هالند، بيلجيم او سويلي امريکا هيوادونو د ايټالیا د «ندراگيتا» په نوم سترې مافيايي ډلې د غړو د نيولو له پاره چاپي ووهلې. د پوليسو په حواله په ټوليزه توگه۹۰ شکمن ونيول شول. په آلمان کې په نور راین ويستفالن او بايرن ايالتونو کې عمليات ترسره شول. ياده مافيايي ډله دمگړۍ د ايټاليا يو تر ټولو ځواکمنه ډله بلل کيږي. دا ډله په اروپا کې د مخدره موادو قاچاق کې لاس لري.
ترکیې د دوو لوړو پوړو سعوديانو د نيولو امر جاري کړي
د ترکیې څارنوالۍ د اکتوبر میاشتې په پېل کې د وژل شوي خبريال جمال خاشقجي د قتل په قضيه کې د سعودي عربستان د وليعهد د دوو نژدې کسانو د نيولو له پاره عريضه کړې ده. د ترکیې د انادولو خبري آژانس په حواله دا عریضه د سعودي د استخباراتو د پخواني مرستيال مشر احمد الاسيري او د پاچا د رسنيو د برخې د پخواني مشاور سعود الکهتاني د نيولو له پاره شوې ده. ویل شوي چې دا کسان ښايي د قتل په طراحانو کې شامل وي.