لس تر ټولو لنډې جګړې وپېژنئ ـ انځورونه
د جنګ د نوم په اورېدو سره د اکثرو انسانانو په ذهن کي مياشتي کالونه ادامه لرونکي جګړې ورځي. د نړۍ تر تولو اوږد جنګ ۱۰۰ کاله دوام وکړ. خو د پاکستان او هند د ۱۹۷۰ کال جګړې صرف ۱۳ ورځې دوام وکړ. نورې لنډې جګړې دلته وپېژنئ:
۹ مقام ـ ۱۸ ورځې ـ د ګرجستان او ارمنستان جګړه
د عثماني خلافت د ړنګېدو وروسته د تفلس، بروچالي او الکالکلاکي سيمو پر سر د ګرجستان او ارمنستان تر منځ جګړه رامنځ ته سوه. دغې جګړې د ۱۹۱۸ کال د دسمبر مياشتي د ۷مې نېټي څخه تر ۳۱مې نېټي پوري دوام وکړ. په دې توګه نو دغه جګړه د نړۍ يوه له تر ټولو لنډو جګړو څخه وه چي هيڅ ښکېل اړخ ونه ګټله بلکه په اوربند پای ته ورسېده.
۸ مقام ـ ۱۶ ورځې ـ د هسټينګس جګړه
په ۱۰۶۶ ميلادي کال د ويليم په مشرۍ د نورمان فرانسوي پوځ او د هېرولد ګويسن په مشرۍ د بريتانوي پوځ جګړه رامنځ ته سوه. دغې جګړې له ۲۸ سپتمبر څخه تر ۱۴ اکتوبر پوري ۱۶ ورځي دوام وکړ او پکښي د ويليم پوځ ګټونکی سو.
۷ مقام ـ ۱۴ ورځې ـ د سربستان او بلغاريې جګړه
د ۱۸۸۵ مېلادي کال د سپتمبر مياشتي په ۱۸مه نېټه عثماني خلافت او بلغاريې پرېکړه وکړه چي د بلغاريې په ختيځ روميليا ولايت کي د پلوفديف ښار الحاق کړي. خو سربستان د دې مخالفت کاوه. د نوامبر په ۱۴مه نېټه دغه مخالفت د جګړې لامل سو او ۱۴ ورځې يې دوام وکړ. بلغاريې دغه جګړه وګټله.
۶ مقام ـ ۱۳ ورځې ـ د هند او پاکستان جګړه
د ختيځ پاکستان (بنګله دېش) پر سر په ۱۹۷۱ کال د هند او پاکستان تر منځ يوه جګړه رامنځ ته سوه چي د دسمبر مياشتي د ۳يمي نېټي او ۱۶مې نېټي تر منځ يې دوام وکړ. پاکستان دغه جګړه بايلوله او په نتيجه کي يې ختيځ پاکستان ورڅخه بېل سو او د بنګله دېش په نوم يو نوی هيواد رامنځ ته سو. دغې جګړې ۱۳ ورځي دوام وکړ او د نړۍ يو له تر ټولو لنډو جګړو څخه ؤ.
۵ مقام ـ ۱۰ ورځې ـ د يونان او بلغاريې جګړه
په ۱۹۲۵ کال د یونان او بلغاريې تر منځ د يو شمېر سيمو پر سر يو جنګ پېښ سو. ويل کيږي چي د اکتوبر په ۱۸ مه نېټه د يوناني عسکر يو سپي د بلغاريې تر سرحد وځغستل او يوناني عسکر ورپسې منډي وهلې چي د بلغاري سرحدي عسکرو له خوا په ډزو ووژل سو. په دې توګه نو د اکتوبر په ۱۹مه نېټه جګړه پېل سوه او لس ورځي وروسته د يو تفاهم ليک په لاسليک کېدو پای ته ورسېد.
۵ مقام ـ ۱۰ ورځې ـ د سلووېنيا د آزادۍ جګړه
سلووينيا د پخوانۍ يوګوسلاويا برخه وه. په ۱۹۹۱ کال د سلوويني سيمي د دفاع ډلې له خوا د سلووينيا د خپلواکۍ له پاره فعاليتونه ګړندي کړل. د ۱۹۹۱ کال د جون مياشتي په ۲۷مه نېټه د يادي نظامي ډلې او د يوګوسلاويا د پوځ تر منځ جګړه پېل سوه چي لس ورځي وروسته د سلووينيا په آزادۍ پای ته ورسېده. سلووينيا اوس يو خپلواک هيواد دی.
۴ مقام ـ ۶ ورځې ـ د اسرائيل شپږ ورځنۍ جګړه
د مصر، اردن، سوريې او عراق څلور اسلامي هيوادونو په ۱۹۶۷ کال د اسرائيل پر ضد جګړه اعلان کړه. خو اسرائيل څلور واړه هيوادونه د ۶ ورځو په جريان کي مات کړل. د دغې جګړې وروسته د اسرائيل خاوره تر پخوا لا پراخه سوه.
۳ مقام ـ ۵ ورځې ـ د روسيې او ګورجستان جګړه
د ابخازيا او اوسيتيا د سيمو پر سر په ۲۰۰۸ کال د روسيې او ګورجستان تر منځ جګړه رامنځ ته سوه. دغه جګړه چي د اګست مياشتي په ۷مه نېټه پېل سوې وه پنځه ورځي وروسته د ګورجستان په ناکامۍ پای ته ورسېده او روسيې هم ابخازيا او هم اوسيتيا خپلې کړې.
۲ مقام ـ ۱۰۰ ساعته ـ د اېل سلوادور او اندوراس جګړه
په ۱۹۷۰ کال د فيفا تر نظارت لاندي د اېل سلوادور او اندوراس د فټبال لوبډلو تر منځ له سيالۍ څخه د وتنې يا پاته کېدنې يوه لوبه تر سره سوه. د اېل سلوادور لوبډلې ۳ او د اندوراس لوبډلې ۲ ګولونه وکړل او په دې توګه اېل سلوادور دغه لوبه وګټله. په دې وخت کي د اېلسوادور پوځ پر اندوراس بريد وکړ. د جولای په ۱۴ پېلېدونکي دغې جګړې ۱۰۰ ساعته دوام وکړ او د نورو امریکايي هيوادونو تر فشار وروسته پای ته ورسېده.
۱ مقام ـ ۳۸ دقيقې ـ د زنجبار سلطنت او بريتانيې جګړه
د بريتانويانو او د زنجبار د سلطنت تر منځ جګړه د ۱۸۹۶ کال د اګست مياشتي په ۲۷مه نېټه پېل سوه. دغې جګړې د ۳۸ او ۴۵ دقيقو تر منځ جريان وکړ او د نړۍ تر ټولو لنډه جګړه بلله کيږي. بريتانويانو په دغه جګړه کي د زنجبار سلطنت ته ماته ورکړه.