د سرطان نړيواله ورځ؛ د مخنيو او درملني په اړه یې بحثونه

سيگريټ مه څکوئ. له تنباکو څکولو او ژوولو څخه پرهيز وکړئ. په هغو ځايونو کي ژوند يا و اوسيږئ چي د سگريټو له دوده پاک وي. د سيگريټو د دود غير مستقيم تنفس، په سرطان ناروغۍ د اخته کيدو په مهمو لاملونو کې راځي.

کوښښ وکړی چي طبيعي وزن ولرئ. نوي څېړني ښيي چي ډير وزن په سرطان ناروغۍ د اخته کيدو خطر زياتوي.

هره ورځ ډير بدني فعالیت ولرئ. هرڅوک چي ډير پر پښو گرځي او د ورځي ډير پياده مزل کوي، يوازي ځان ته خوښي نه وربخښي، بلکي د سرطان ناروغۍ د پيدا کېدو خطر لږوي. ښه به وي چي په اوونۍ کي درې واري ۳۰ دقيقې وځغلی نه دا چي دوه واري دوه ساعته.

سالمه تغذيه هيره نه کړئ. په ورځ کي پنځه واري مو په خپلو خوړو کي ميوو، سابو او ډول ډول حبوباتو ته ځای ورکړئ. له سرې کړي غوښي څخه پرهيز وکړئ او هغه څښاک چي ډيره بوره لري ترې ډده وکړئ.

څېړنو ښوولې ده چي د سرطان ناروغۍ په مخنيوي کي ويتامين سي ډير گټور دي.

څېړونکو موندلې ده چي په بدن کي د ويټامين ډې کمښت د سرطان ناروغۍ په ځانگړې توگه د تي او پروستات سرطان له پرمختگ سره مرسته وکړي. د بدن ويټامين ډې ته د لمر وړانگي اړيني دي. خو دغه ويټامين په داسي غذاي موادو لکه کب او چرگ په غوښو کي هم سته.

د لمر لږ وړانگي تاسو ته تاوان نه رسوي او پرهيز هم مه ترې کوئ. خو لمر ته له حمام کولو څخه ډده وکړئ. په ځانگړې توگه کوچنيان لمر ته ډېر مه پرېږدئ.

د سرطان ناروغۍ ژر تشخيص د دغي ناروغۍ د درملني تر ټولو مهم لامل دئ. پر وخت کنترول کولای سي تر سرطان وړاندي مراحل تشخيص کړي او درملنه ئې وسي. هر څومره ژر چي سرطان تشخيص سي هغومره ژر يې درملنه کيدای سي.

په جرمني کي د ۵۰ او ۶۹ کلونو ترمنځ ښځو له پاره د ماموگرافي کتنه وړيا ده او هر دوه کاله يووار کيږي. خو طبيبان ښځو ته توصيه کوي چي هر دوه کاله وروسته د تي سرطان کتني ته معطله نه سي، بلکي پخپله هم هر وخت پر ځان پام وکړي چي که يې په تي کي سخت والی احساس کړي ژر ډاکټر ته مراجعه وکړي.

ځيني ويروسونه او باکترياوي کيدای سي په سرطان ناروغۍ له اخته کېدو سره مرسته وکړي. هپاتيت ب يوه له هغو ناروغيو څخه ده چي د يني سرطان لامل گرځيدلای سي. ځکه نو ډاکتران د کوچنيانو او زړو خلکو د واکسين کولو لارښوونه کوي.