د دوو امریکایي سرتیرو د وژل کیدو په اړه نوي جزئیات
۱۳۹۸ مرداد ۸, سهشنبه
د امریکا متحده ایالاتو پوځ د دوشنبې په ورځ وویل چې دوه سرتیري یې په افغانستان کې د جګړې پر مهال وژل شوي دي. پوځ په دې اړه چې دغو ځواکونو څرنګه، په کوم ځای او کله خپل ژوند له لاسه ورکړی دی، معلومات نه وو ورکړي.
د کندهار د پولیسو مرستیال محمد قاسم، بیا د سه شنبې په ورځ ویلي دي چې پیښه د افغان ځواکونو په یوې اډې کې کله چې امریکایي ځواکونو ترې لیدنه کوله، رامنځ ته شوې ده. قاسم وویل: «لومړي معلومات ښيي چې دوه امریکایي عسکر وژل شوي او یو بل ټپي دی.»
امریکايي ځواکونو په دې اړه له نظر ورکولو څخه ډډه کړې ده.
د طالبانو ویاند ذبیح الله مجاهد، د فرانسې خبري آژانس ته یوه اعلامیه استولې ده چې پکښې راغلي دي چې دغه دوه امریکایي ځواکونه د یوه افغان سرتیري له خوا، چې طالبانو ته نه وو اوښتی، وژل شوي دي. په بیانیه کې راغلي دي: «یوه وطنپاله افغان سرتیري پر هغوی ډزې وکړې او ویې وژل.»
د کندهار د والي ویاند بهیر احمدي، هم تائید کړې ده چې پیښه د افغان ځواکونو په یوه اډه کې رامنځ ته شوې ده. د جولای میاشتې پر ۱۷مه نیټه هم یوه افغان سرتیري په غزني ولایت کې یو افغان افسر په ډزو وواژه. طالبانو د غزني د پیښې پړه منلې وه.