د داعش ډلې آلمانی ترهګر په لس کاله بند محکوم شوی
۱۴۰۰ آذر ۶, شنبه
د آلمان له دينسلاکن څخه د داعش د ترهګر په نوم پېژندل شوي آلمانی، دينلس د. د قتل په تور د محکمې له خوا په لس کاله بند محکوم شوی دی. د دوسلدورف لوړې آيالتي محکمې هغه د جنګي جنايتونو له کبله پړ وباله. د قاضيانو په باور دغه آلماني تبعه په سوريه کې د اسلامي دولت په نوم ډلې په يوه زندان کې يو بندي تر مرګه پورې ربړولی وو. خو د مرګونې شکنجې په دوو نورو مواردو کې دغه ۳۱ کلن آلماني سړي ته برائت ورکړل شوی دی.
د آلمان لويې څارنوالۍ د پړې د جديت له کبله د عمري بند عريضه او غوښتنه کړې وه. مدافعينو یې بيا د هغه د آزادولو هڅه کوله. د تورن کس مدافع وکیلانو د توجيه په توګه د يو څو تنو شاهدانو په خبرو کې ګويا د تضادونو استدلال کړی وو. تورن کس خپله خاموشي اختيار کړې وه او د قضيې په نورو پړاوونو کې کړو څرګندونو ته يې اشاره کړې وه. تر دې مخکې يې د خپلو نورو همکارو اسلام پالو مجرمينو پر ضد هر اړخيزې خبرې او څرګندونې کړې وې. دغې وروستۍ قضيې هم له دوو کلونو زيات وخت دوام وکړ.
د »لوبرګ لوا« ډلې غړيتوب
نيلس د. په ۲۰۱۶ کال کې لا د عين محکمې له خوا د داعش د تروريست په صفت په څلور نيم کاله بند محکوم شوی وو. هغه د »لوبرګ لوا« په نوم د سلفيانو په يوې مشهورې شوې ډلې پورې تعلق درلود چې د آلمان د دينسلاکن ښار په لوبرګ ناحيه کې وه او په سوريه کې له داعش سره يو ځای شوې وه.
هغه مهال محکمه په دې نظر وه چې نيلس د. د داعش په يوې تهاجمي ډلګۍ پورې ښايي اړه درلودلې وي. خو د هغه تر محکوم کېدو وروسته ډېر شمېر پخواني بنديان راپيدا شول چې ويې ويل چې دغه آلمانی ترهګر د سوريې د منبيج ښار په يوه زندان کې د داعش د شکنجه کوونکو له جملې څخه يو وو. د داعش په هغو زندانونو کې بنديان تر شل [فلج] کېدلو پورې ربړول او ځورول کېدل. دغه خبره د رواني قضيې مشر قاضي، يان فان لېسن، وکړه. د هغه په خبره سخت شکنجه شوي کسان بيا د نورو خلکو د ويرولو په موخه نندارې ته هم وړاندې کېدل.