د جرمني د بهرنيو چارو وزير له افغان چارواکو سره وليدل
۱۳۹۶ آذر ۲۹, چهارشنبه
گابریل نن چهارشنبه (ډسمبر میاشتي۲۰ نیټه) کابل ته تر رسېدو وروسته وویل، چي «په سیمه کي د الماني پوځ په نظر دعسکرو نسبي ډیرول عاقلانه عمل دی». خو ده پخپله په دې هکله دريځ ونه نیو او ویې ویل چي «زه نه غواړم، د هغه اټکل وکړم».
په اوس وخت کي په افغانستان کي تقریبأ ۱۰۰۰ الماني عسکر ځای پرځای دي، چي د نورو ترڅنگ د افغان ځواکونو په روزنه او مشورو ورکولو کي برخه اخلي. خو د المان پوځ د نور ډیر پرسونل غوښتنه کوي، ترڅو کار يې اغیزمن تمام سي.
د جرمني د دفاع وزیري اورزولا فون دیر لاین هم پرون سه شنبه (ډسمبر میاشتي۱۹ نیټه) په مزارشريف کي له خپلو ځواکونو سره د ليدني پرمهال وعده ورکړې وه، چي په خپل پارلمان کي به په افغانستان کي د نورو ډیرو الماني عسکرو مشوره ورکړي.
د جرمني پارلمان همدا تیره اوونۍ په افغانستان کي د المان پوځي ماموریت د درو نورو میاشتو له پاره تمدید کړ. د پارلمان د فیصلې پر اساس بیا هم هلته تر۹۸۰ اضافه عسکر نه سي مېشتېدلای. خو د نوی کال په مارچ میاشت کي به بیا په دې هکله تصمیم نیول کیږي.
ناټو په افغانستان کي خپل نظامي ماموریت د ۲۰۱۴ م کال په پای کي پای ته ورساوه.