افغان حکومت د کندز ښار سقوط تایید کړ
۱۳۹۴ مهر ۶, دوشنبه
اعلان
د افغانستان د کورنیو چارو وزارت ویاند صدیق صدیقي، د اسوشیتد خبري آژانس ته ویلي دي چې «د کندز ښار د طالبانو لاس ته لویدلی دی».
طالب جنګیالیو د دوشنبې سهار وختي له څو اړخونو د کندز پر ښار باندې برید وکړ او د ښار محکمه، روغتون او دولتي ودانۍ یې تر خپل کنترول لاندې راوستې. د بې سرحده ډاکټرانو نړیوالې ادارې ویلي دي چې تر اوسه پورې یې په دغه ښار کې د ۱۰۰ تنو ټپیانو درملنه کړې ده.
د کندز ښار په داسې حال کې د طالبانو په لاس سقوط کوي چې د ولسمشر په توګه د محمد اشرف غني، د کار د پیلیدو یو کال پوره کیږي.