حکومت: ۳۰۰ طالبان مو وژلي - طالبان: نهه ولسوالۍ مو نیولي | افغانستان | DW | 03.07.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

حکومت: ۳۰۰ طالبان مو وژلي - طالبان: نهه ولسوالۍ مو نیولي

افغان چارواکي وايي چې په وسلوالو نښتو کې یې لږ تر لږه ۳۰۰ طالبان وژلي خو طالبانو بیا ادعا کوي چې په بدخشان او کندهار کې یې نهه ولسوالۍ نیولي دي. د بهرنیو ځواکونو په وتلو سره طالبانو خپلو بریدونو ته شدت ورکړی دی.

په داسې حال کې چې له افغانستانه د بهرنیو ځواکونو د وتلو بهیر مخ پر بشپړیدو دی، طالبانو په ټول هیواد کې خپلو بریدونو ته زور ورکړی دی. د بدخشان ولایت د ولایتي شورا غړو محمد ذاکر آرین او محبوب الرحمن طلعت د شنبې په ورځ وویل چې په تیرو ۲۴ ساعتونو کې امنیتي ځواکونه اړ شوي چې د دې ولایت له اوو ولسوالیو په شا تګ وکړي.

بل لوري ته په کندهار ولایت کې هم د امنیتي وضعیت د ترینګلي کیدو خبرونه ورکول کیږي. د ولسي جرګې غړی خلیل احمد مجاهد او د کندهار ولایت د ولایتي شورا غړی نعمت الله وفا وايي چې طالبانو په دې ولایت کې لږ تر لږه دوه ولسوالۍ نیولي دي.

په تخار ولایت کې بیا چارواکي له طالبانو سره د سختو جګړو خبر ورکوي. د دې ولایت د ولایتي شورا د غړو په خبره، د تخار په کلفګان ولسوالۍ کې تیره شپه د طالبانو او امنیتي ځواکونو ترمنځ اوږده او شدیده جګړه شوې ده.

بل لوري ته د کورنیو چارو وزارت بیا ویلي چې امنیتي ځواکونو د ننګرهار ولایت په حصارک ولسوالۍ کې د طالبانو پرضد په یوه ځوابي برید کې لږ تر لږه ۲۰ تنه طالب جنګیالي وژلي دي.

په عین وخت کې د جګړو له شدت سره سم هوايي ځواکونو په هلمند ولایت کې د طالبانو پر اهدافو بریدونه کړي او پکې د ګڼ شمیر طالب جنګیالیو د وژل او ټپي کیدو خبر ورکوي. د افغانستان دفاع وزارت نن د شنبې په ورځ وویل چې په تیرو ۲۴ ساعتونو کې یې د هیواد په مختلفو ولایتونو کې له ۳۰۰ ډیر طالب جنګیالي وژلي دي. 

د هوايي بریدونو تر ټولو تازه پیښه همدا نن د شنبې په ورځ په جنوبي هلمند ولایت کې شوې ده. د هلمند د ولایتي شورا غړ عطاالله افغان د فرانسې خبري آژانس ته په دې هکله وویل: «په تیرو څو ورځو کې افغان هوايي ځواکونو د طالبانو پر پټنځایونو باندې خپلو بریدونو ته شدت ورکړی دی چې په نتیجه کې یې ګڼ شمیر یاغیان وژل شوي دي.»

طالبان بیا د حکومت دغه ادعاوې ردوي. د دغه شمیرو تائید په مستقله توګه ستونزمن دي دا ځکه چې دواړه لوري یو بل ته د تلفاتو اړولو ادعاوې کوي.