سعودي عربستان او ایران مستقیمي خبري سره کړي
۱۴۰۰ فروردین ۲۹, یکشنبه
دغه خبر فایننشل ټایمز نن یکشنبه (د اپریل میاشتي ۱۸ مه) ورکړی او د هغه هدف یې د دواړو هیوادونو ترمنځ د تشنج له منځه وړل یاد کړی دی. د دغي ورځپاڼي په حواله د سعودي عربستان او ایران لوړ رتبه نمایندګانو څو ورځي دمخه، د اپریل پر نهمه په بغداد کي سره کتلی وه او د نورو ترڅنګ یې د یمن د نیابتي جنګ په هکله هم خبري سره کړي دي.
د سعودي عربستان او ایران ډیپلوماتیک مناسبات د یمن د جنګ تر سیوری لاندي څلور کاله دمخه قطع سول.
د اوسنیو مذاکراتو هدف د یمن د جنګ د ختمیدو د حل لاري پیداکول او ددواړو هیوادونو ترمنځ د تشنج له منځه وړل اعلان سوی دی. د خبرو دغه لمړنی مرحله مثبته ارزیابي سوې ده. دغه خبره فایننشل ټایمز د دغو هیوادونو د یوه مسؤل شخص په حواله کړې ده.
دا هم پداسي حال کي ده، چي سعودي عربستان او ایران د رویترز خبري آژانس لخوا د دغي لیدني کتني او هغه د نتایجو په باب عکس العمل ندی ښکاره کړی.
د دواړو هیوادو ترمنځ اوسني مذاکرات پداسي حال کي تر سره کیږي، چي د امریکا حکومت رسمأ د یمن د جنګ د ختمیدو غوښتنه کړې ده.
د بلي خوا د ایران د اټومي تړون په باب د ګډ کمیسون د خبرو شروع کیدل او خبرو ته د امریکا بیرته ورداخلیدل هغه مسایل دي، چي د سعودي عربستان دپاره د خاص اهمیت درلودونکي دي.
سعودي عربستان او د منطقې نورعربي هیوادونه په دغو مذاکراتو او ایران د اټومي پروګرام په شخړه کي د مشارکت غوښتنه کوي.
رویترز خبري آژانس د دغي لیدني کتني په ارتباط ریاض ته د عراق د صدراعظم، مصطفی کاظمي د تیري میاشتي سفر ته اشاره کوي.
آ./م.ق./ا.ا.