پاکستاني طالبان له حکومت سره د سولې د خبرو په موخه اوربند غځوي | سيمه | DW | 12.05.2022

د دویچه ویله نوې پاڼه وګورئ

د dw.com بیټا بڼه تر اوسه پورې بشپړه شوې نه ده. ستاسې نظر د دې پاڼي په لا ښه جوړولو کې مرسته کولی شي.

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

سيمه

پاکستاني طالبان له حکومت سره د سولې د خبرو په موخه اوربند غځوي

پاکستاني طالبانو له حکومت سره د اوربند د تړون موده غځولې څو د سولې خبرې اترې ترسره شي. پاکستاني طالبانو په دې وروستيو کې خپلو بريدونو ته زور ورکړی وو. زیاته شوې چې د مذاکراتو زمینه طالبانو برابره کړې ده.

Pakistan Waziristan Soldaten im Shawal Tal

آرشیف انځور

د وسله والو دوو سرچينو د فرانسې خبري آژانس ته ويلي چې تحريک طالبان پاکستان يا ټي ټي پي ډله پر دې سلا شوې چې د کوچني اختر په مناسبت  شوی اوربند اوس د مې میاشتې تر ۱۶مې نيټې پورې وغځيږي.

هغه ليک کې چې د اوربند په تړاو کې پکې سپارښتنه شوې او د فرانسې خبري آژانس ليدلی دی، جنګیالو ته ویل شوي چې »د مشرتابه له خوا نیول شوی تصميم باید تر پښو لاندې نه کړي.»

دواړو سرچينو ویلي چې د پاکستاني منځګړو يوې ډلې افغانستان ته سفر کړی دی څو د ټي ټي پي له مشرتابه سره وګوري. زياته شوې چې د دې خبرو اترو زمينه افغان طالبانو برابره کړې ده. د پاکستان حکومت تر اوسه په دې اړه کومه تبصره نه ده کړې.

پاکستاني طالبانو د خبرو د پیل له پاره شرط ایښی دی

په افغانستان کې د تېر میلادي کال په اګست میاشت کې واک ته د طالبانو تر رسېدو راهيسې د تحريک طالبان پاکستان ډلې پر حکومتي ځواکونو خپل بريدونه ډېر کړي دي.

د پاکستان حکومت هم پر افغان طالبانو د تحريک طالبان پاکستان غړيو او نورو وسله والو ته د پټنځايونو د ورکولو او د هغوی د تشويقولو تورونه لګوي او وايي چې وسله وال د پاکستان او افغانستان ترمنځ له پولې څخه تیريږي او په پاکستان کې عمليات ترسره کوي.

 پاکستان وايي د افغانستان له خاورې ترهګریز بریدونه کیږي

د پاکستان حکومت تېر کال هم د يوه مياشتني اوربند په ترڅ کې له ټي ټي پي ډلې یا پاکستاني طالبانو سره د سولې يوه تړون ته د رسېدو په موخه خبرې اترې ترسره کړې خو دغه مذاکرات بريالي نه شول. 

په اسلام آباد کې حکومت په کابل کې واک ته د طالبانو تر رسېدو راهيسې تل د افغانستان له لوري پر خپله خاوره د بريدونو په اړه شکايت کوي چې دې کار د افغان طالبانو د ادارې او پاکستان ترمنځ ديپلوماتيکي ترنګلتياوې هم رامنځته کړي دي.

پاکستان طالبانو ته د اورپکو په اړه خبرداری ورکړ

تيره مياشت طالب چارواکو هم ويلي ول چې په ختیځ کونړ ولايت کې د پاکستان يوه هوايي برید ۴۷ کسان وژلي دي. هغه وخت د پاکستان حکومت پر دې بريد کومه تبصره ونه کړه خو دا يادونه یې وکړه چې په کابل کې واکمنان د وسله والو د بريدونو د مخنيوي له پاره بايد خپل سرحدونه خوندي کړي.

خو افغان طالبانو دا يو «ظالمانه» بريد بللې وو «چې د افغانستان او پاکستان ترمنځ دښمنۍ ته لاره هواروي.»

په مارچ مياشت کې د داعش ډلې يوه ځانمرګي بريد ګر چې د پاکستاني چارواکو په حواله يو افغان وو، د پېښور په يوه جومات کې ۶۴ کسان ووژل.

ملګرو ملتونو هم خبرداری ورکړی وو چې په افغانستان کې وسله والې ډلې «د تېرې نزدې مودې د بل هر وخت په پرتله له ډېرې آزادۍ برخمن دي.»

ب. ص/ خ. ح (AFP)