«توهین نه زغمو»، فرانسې له ترکیې څخه خپل سفیر ایستلی دی | آلمان او نړۍ | DW | 25.10.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

«توهین نه زغمو»، فرانسې له ترکیې څخه خپل سفیر ایستلی دی

اردوغان د اسلام په تړاو د فرانسوي ولسمشر ماکرون د څرګندونو په غبرګون کي هغه ته «د دماغي معاينې» مشوره ورکړه. فرانسې خپل سفير له انقرې بېرته وغوښت.

اردوغان د اسلام په تړاو د فرانسوي ولسمشر د څرګندونو په غبرګون کي هغه ته «د دماغي معاينې» مشوره ورکړه او فرانسې له انقرې څخه خپل سفیر بېرته ورغوښتی دی.

فرانسې د رجب طيب اردوغان له خوا پر خپل فرانسوي هم منصب ايمانويل ماکرون د سختو نيوکو وروسته له انقرې څخه خپل سفير بېرته ور وغوښت.

دا د ماکرون پر ضد د اردوغان د لانجمنو څرګندونو په وړاندي د فرانسې دیپلوماتيک غبرګون دی. په دې ترڅ کي د «اسلام سره ضديت» او «ماکرون دي د خپل دماغ معاينه» وکړي په شان فقرې واورېدل سوې.

ماکرون له ترکيې څخه د خپل سفير ايستل د اردوغان د څرګندونو په وړاندي د فرانسې غبرګون ياد کړی دی. د ماکرون په وينا د اردوغان الفاظ «د منلو وړ نه دي.»

له دې مخکي اردوغان په مرکزي اناتوليه کي د خپل ګوند (AKP) په کنګره کي د وينا پر وخت «په اروپا کي د اسلام سره د ضديت د نخښو د مخ په وړاندي زياتېدو» خبره کړې وه.

د بيان آزادي د ديني آزادۍ په مقابل کې

ولسمشر ايمانويل ماکرون يوه اونۍ تر مخه د يو فرانسوي ښوونکي تر قتل وروسته د توندلاري اسلاميزم پر وړاندي د مبارزې اعلان کړی وو. د سامويل پاتي په نوم د تاريخ فرانسوي ښوونکي په ښوونځي کي د شارلي ابدو مجلې له خوا خپاره سوي د اسلام د پيغمبر ص هغه کاريکاتورونه په ټولګي کي ښودلي ول چي له کبله يې د دغي مجلې پر دفتر خونړی ترهګریز بريد تر سره سوی وو. ياد فرانسوی ښوونکی د يو ۱۸ کلن روسي چيچنيايي کس له خوا په چاړه ووژل سو. پوليسو بريدګر په ډزو وواژه.

«د دماغي علاج اړتيا لري»

اردوغان نه يوازي په «اروپا کي د مخ په زياتېدونکي اسلام ضديت د نخښو» خبره وکړه، بلکه هغه په خپلو نيوکو پر ماکرون شخصي لفظي بريد وکړ او د ماکرون په هکله يې وويل: «دغه شخص د اسلام او مسلمانانو په وړاندي څه مشکل لري؟» اردوغان اضافه کړه چي ماکرون سايکولوژيک/دماغي علاج ته اړتيا لري. د هغه په وينا ماکرون په ديني آزادي نه پوهيږي.

ترکيې له دې مخکي د ماکرون پر هغو څرګندونو هم غبرګون ښودلی وو چي په ترڅ کي يې ماکرون د اسلاميزم په وړاندي د فرانسې له اساسي قانون څخه د دفاع خبره کړې وه او زياته کړه يې وه چي ګواکي اسلام په ټوليزه توګه په ټوله نړۍ کي د بحران سره مخامخ دی.

آ./ا.ا./ش.ن.