کاریتاس د افغان مهاجرو د ایستلو مخالف دی | اروپا ته مهاجرت | DW | 08.12.2017
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

کاریتاس د افغان مهاجرو د ایستلو مخالف دی

د آلمان خیریه سازمان «کاریتاس» له دغه هیواد څخه د افغان مهاجرو له اخراج سره مخالفت کړی، حتي که «مجرم» هم وي. دغه سازمان وايي چې نه په افغانستان کې او نه هم په سوریه کې امن شته.

یوازي یوه ورځ وروسته له هغې چې افغانستان ته یوه بله ډله افغان مهاجر بیرته واستول شول، د المان کلیسايي خیریه سازمان «کاریتاس» افغانستان او سورېې ته د مهاجرو له ایستلو سره مخالفت ښودلی دی.

د کاریتاس رئیس، پیترنیهر نن سهار (جمعه د ۲۰۱۷ کال د دسمبر اتمه) آلمانۍ راډیو «زویدویست فونک» ته په یوه مرکه کې وویل چې دا ډير «غیرمسوولانه» کار دی چې د جگړو او کړکیچنو سیمو ته په اخراج لاس پورې شي. هغه یادونه وکړه چې یوازي همدا تیر کال ۱۱ زره انسانان په افغانستان کې د نښتو او جگړو په ترڅ کې وژل شوي او ټپیان شوي دي. د جگړې د قربانیانو هر دریم يې ماشوم دی. هغه وویل چې د افغانستان ډیري سیمې امن نه لري.

د آلمان حکومت وايي چې په افغانستان کې ځینې سیمه شته چې کیدای شي مهاجر هلته واستول شي. د آلمان د ایالتونو د کورنیو چارو وزیرانو په یوه غونډه کې د افغانستان او سورېې په گډون د مهاجرو د اخراج پر موضوع بحثونه وشول. د هغوی د بحثونو غټه موضوع دا وه چې آیا سوریې ته هم مجرم مهاجر او یا هغه چې د آلمان امنیت ته گواښ پیدا کوي، بیرته وایستل شي که نه.

که څه هم د سوریايي مهاجرو د اخراج په هکله د ایالتونو وزیران کومې موافقې ته ونه رسیدل، هغوی په دې هکله سره همنظره دي چې د سوریې امنیتي وضعیت دي له سره و ارزول شي.

له آلمان څخه په لومړي سر کې د پلان له مخې د مجرم گڼل شوو مهاجرو اخراج ته په کتو سره د کاریتاس رئیس ټینگار وکړ چې حتی د هغوی (مجرم مهاجرو) حقوق هم باید خوندي وساتل شي. پیتر نیهر وايي: «لومړی درجه او یا دوهم درجه انسانان وجود نه لري او نه هم دوهمه درجه بشري حقوق وجود لري.» هغه زیاته کړه، کله چې د مهاجرو په اصلي هیوادونو کي امنیتي وضعیت اجازه ورنه کړی چې هغوی هلته واستول شي، نو باید هم هیڅوک اخراج نه کړای شي.

کاریتاس په دې نظر دی: هغه څوک چې په آلمان کې د قانون خلاف عمل وکړي، هغه باید له قانون سره سم په آلمان کې ورسره چلند وشي نه په بل هیواد کې.

د کاریتاس د رئیس په نظر په آلمان کې مهاجرو ته ځای ورکولو او یا د هغوی د کورنیو د راغوښتلو په هکله روان بحثونه د آلمان د خلکو په مینځ کې د سختو ناباوریو سبب گرځي. هغه وویل چې سیاستوالو ته لازمه ده چې د «دغې موضوع تر شا موضوع»، یعني د راتلونکي او د ښه ژوند د شرایطو په هکله د ډيرو خلکو د احساس وړ ناباوري او ویره باید حل او فصل شي.

dpa,epd(B.H/N.Z)

زموږ له ارشيف څخه:

DW.COM