په کراچۍ کې بمي چاودنې مرګ ژوبله اړولې | سيمه | DW | 17.11.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

سيمه

په کراچۍ کې بمي چاودنې مرګ ژوبله اړولې

د پاکستان په تر ټولو ستر او بندري ښار کراچۍ کې روغتیايي چارواکو ویلي چې د جمعې په ورځ په یوه بمي چاودنه کې دوه تنه وژل شوي او اته تنه نور ټپیان دي. تر اوسه پورې کومې ډلې د دې چاودنې مسوولیت نه دی منلی.

د پاکستان د سند ایالت په بندري ښار کراچۍ کې ځايي چارواکو ویلي چې د جمعې په ورځ (د ۲۰۱۸م کال د نومبر میاشتې پر ۱۶ نیټه) یوه بمي چاودنه شوې چې په پایله کې یې دوه تنه وژل شوي او اته تنه نور بیا ټپيان دي. دغه چاودنه د کراچۍ ښار په مالیر سیمه کې شوې چې تل پکې د خلکو ګڼه ګوڼه ډیره وي. د چاوراکو په حواله په دې پیښه کې د سیمې یو شمیر ودانۍ زیانمنې شوي او په خلکو کې یې ویره خپره کړې.

د کراچۍ ښار د پولیسو یوه جګپوړي چارواکي عرفان علي بهادر د فرانسې خبري آژانس ته د پیښې په تړاو وویل: «یو ټایم بم [په ساعت باندې عیار شوی بم] د یوه لاس ګاډي لاندې ځای پر ځای شوی وو چې له امله یې قوي چاودنه رامنځ ته شوې او په پایله کې یې دوه کسان ووژل شول.» د پولیسو دغه چارواکي همدا راز وویل چې په دې چاودنه کې اته تنه نور ټپیان شوي دي. تر اوسه پورې د دې چاودنې مسوولیت کومې ډلې منلی نه دی.

کراچۍ ښار چې د پاکستان یو له اقتصادي مرکزونو څخه شمیرل کیږي، د یوې مودې راهيسې د اسلامپاله سخت دریځو او قومي او مذهبي ډلو له تاوتريخوالي څخه کړیږي.

په عین وخت کې د کراچۍ د جناح روغتون چې جسدونه او ټپیان ور انتقال شوي، یوې لوړپوړې ډاکټرې سیمي جمالي هم د مرګ ژوبلې پخلی کوي خو وايي چې په ټپیانو کې د دوو تنو روغتیايي وضعیت د اندیښنې وړ دی.

په وروستیو کلونو کې په پاکستان کې تر یو لړ پوځي عملیاتو وروسته خشونت په بې سارې توګه کم شوی. خو د دې باوجود د افغانستان او پاکستان د پولې په اوږدو کې د ترسره شویو عملیاتو سربیره یاغي او ترهګرې ډلې د دې وړتیا لري چې خونړي بریدونه او چاودنې ترسره کړي.

اعلان