په يونان کې يوې افغان مهاجرې بله افغان مهاجره ووژله | اروپا ته مهاجرت | DW | 23.05.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

اروپا ته مهاجرت

په يونان کې يوې افغان مهاجرې بله افغان مهاجره ووژله

يوه ځوانه افغان مهاجره د یونان په يوه کمپ کې د بلې افغان مهاجرې ښځې له خوا ووژل شوه. دغه پيښه د يونان د لیسبوس ټاپو په کمپ کې د مهاجرو د کتار په جريان کې رامنځته شوې ده.

د آلمان خبري آژانس له آتن څخه خپل د شنبې ورځې (د می ۲۳مه) په رپوټ کې ليکي چې د يونان پولیسو، دغه پيښه، د يونان حکومتي تلويزيون ERT ته تائيد کړې او ويلي دي چې پيښه د جمعې (د ۲۰۲۰ کال د می ۲۳مه) په ماښام د شمالي آژې په سيمه کې رامنځ ته شوې ده.

په سيمه کې حکومتي راډیو د شنبې په ورځ خبر ورکړ چې تورنه ښځه تر پيښې وروسته سيمې ته نژدې تپو ته وتښتيده، خو وروسته د شپې په جريان کې ونيول شوه.

د پوليسو د سرچينو د معلوماتو پراساس، دغه دوه ښځې د کمپ په خيمو کې چې يو بل په ګاونډ کې اوسيدې ژوند کاوه او پيښه د دوی د ماشومانو پر سر د راوتلي جنجال له امله رامنځ ته شوې ده.

د يوې ځايي خبري رسنۍ د رپوټ پر اساس، يوناني چارواکو اوس دغه دوه افغان کورنۍ له کمپ څخه بل ځای ته انتقال کړي دي.

د يونان په موريا کمپ کې د مهاجرو د ډيرې ګڼې ګوڼې له امله، تر دې وړاندې هم د مهاجرو تر منځ د راوتلو شخړو رپوټونه ورکړل شوي دي. په دغه کمپ کې د ژوندانه شرايط ډير خراب دي چې په کراتو د بشري ډلو له خوا پرې سختې نيوکې شوي دي.

د تازه ارقامو له مخې د يونان په موريا کمپ کې اوس مهال شا او خوا ۱۷ زره مهاجر ژوند کوي، په داسې حال کې چې دغه کمپ په اصل کې د ۲۷۵۷ کسانو له پاره جوړ شوی دی.

د مهاجرو په چارو کې د ملګرو ملتونو عالي کمشنرۍ (UNHCR) او نور مرستندوي سازمانونه له يوه کال راهيسې د دغه کمپ د بنديدو غوښتنه کوې او وايي چې په کې ميشت مهاجر دې بل ځای ته انتقال کړل شي.

آژانسونه/ م.ک.ص/ ا.ا

د مهاجرو پر موضوع زموږ له آرشيف څخه يو انځوريز البوم: