په ناروې کي يوه بريد کوونکي پنځه تنه په غشي او لیندۍ وژلي | آلمان او نړۍ | DW | 14.10.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

په ناروې کي يوه بريد کوونکي پنځه تنه په غشي او لیندۍ وژلي

په ناروې کي یوه بریدکوونکي د غشي په ویشتلو سره ۵ کسان وژلي او دوه تنه نور یې زخمیان کړي. پولیسو په ټولنیزو رسنیو کي د جعلي خبرونو د خپریدو د مخنیوي له پاره د هغه په اړه لومړني معلومات خپاره کړي.

د ناروې د پولیسو د سرچینو په حواله ، یوه ۳۷ کلن ډنمارکي د ناروې پایتخت اوسلو په جنوب لویدیځ ښارگوټي، کانگسبرگ کي د غشي او لیندۍ په ویشتلو سره خپل پر شاوخوا پنځه تنه وژلي او دوه تنه نور یې زخمیان کړي دي. بریدکوونکی د پولیسو له خوا نیول سوی دی.

د لومړنیو معلوماتو له مخي هغه په یوازي سر دغه برید ترسره کړی او پر بل چا باندي ددغي پیښي د رامنځته کیدو شک نه کیږي. د ناروې پولیسو همدارنگه د ترهګرۍ احتمال هم نه دی رد کړی.

د پولیسو په اعلامیه کي راغلي چي ددغي پیښې په تړاو د جعلي خبرونو د خپریدو څخه د مخنیوي له پاره یې ددغه کس په اړه لومړني معلومات خپاره کړي دي.

ددغو سرچینو په حواله په دې اړه د جعلي خبرونو خپرول څو تنه هغه کسان اندیښمن کړي چي ددغي پیښې سره یې هیڅ ډول تړاو نه درلود.

د پولیسو د معلوماتو تر خپریدو مخکي د »ټي وي ۲« تلویزیوني شبکې رپوټ ورکړی وو چي شکمن کس مسلمان سوی او ښایی له ډیره وخته یې صحي مشکل درلود. خو د ناروې رسمي ادارو دغه رپوټ نه دی تأیید کړی.

د پولیسو ویاند، آیویند آس، چهار شنبه د شپې ناوخته په یوې مطبوعاتي غونډه کی وویل:«د پیښي په پام کي نیولو سره، طبیعي خبره ده چی پلټنه باید وکړو چی آیا هغه یو ترهگري برید وو او که څنګه.»ناروې: پر مسجد بريدګر په ۲۱کاله بند محکوم سو

د پولیسو د رپوټ له مخي، بریدکوونکي د چارشنبه په ماښام شاخوا شپږ نیمو بجو د کانگسبرگ د ښار په مرکز کي پر خلکو برید وکړ. نوموړی برید کوونکی ۱۵ دقیقې وروسته تر دغه برید د پولیسو له خوا ونیول سو. د «ټي وي ۲» د شبکې د رپوټ له مخي نوموړي بریدکوونکي پر غشي او لیندۍ سربیره وسله هم له ځانه سره درلوده.

د ناروې د پولیسو لوړپوړو چارواکو امر کړی چي ددغه هیواد ټولو پولیسو ته دي وسلې ورکول سي. معمولاً د ناروې اکثره پولیس وسلې نه لري. همدارنگه ددغه هیواد د رسمي سرچینو له مخي د ناروې استخبارات هم تر دغي پیښي وروسته د تیارسی په حال کي دي.

ګ. پ/ ب. ص (AFP)