په ترکیه کي په ۶۰ مهاجرو ډکه کښتۍ ډوبه سوې، اوه جسدونه پیدا سوي | آلمان او نړۍ | DW | 01.07.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

په ترکیه کي په ۶۰ مهاجرو ډکه کښتۍ ډوبه سوې، اوه جسدونه پیدا سوي

د ترکیې چارواکو ویلي چي څو ورځي مخکي د مهاجرو یوه کښتۍ ددغه هیواد په وان جهیل کي ډوبه سوې او ددې بیره سته چي پکې سپرو شاوخوا ۶۰ تنو به ژوند له لاسه ورکړی وي. تر اوسه پوري ۶ مړي پیدا سوي او په نورو پسي لټه دوام لري.

د ترکیې داخله وزیر سلیمان سویلو ویلي چي دغه کښتۍ د شنبه په ورځ لادرکه سوې ده. چارواکو د څرخي الوتکو او کښتیو په مرسته خپلی پلټني پیل کړې چی تر اوسه پوري ادامه لري.

د ترکیې داخله وزیر چی د ژغورنې پر عملې باندي د څارني له پاره یې  د وان ښار ته سفر کړی، خبریالانو ته ویلي چي د شنبې د ورځي راهیسی، تر اوسه ۶ جسدونه پیدا سوي. هغه ویلي چي ښایی په دغه بیړۍ کي له ۵۵ څخه تر ۶۰ پوري غیرقانوني مهاجر سپاره ول.

سویلو ویلي چي کارپوهان فکر کوي، دغه کښتۍ د اوبو په ۱۱۰ تر ۱۲۰ مترۍ کي ډوبه سوې وي.  له انقرې څخه تر اوبو لاندي د عکس اخیستلو یو سیستم دغي سیمي ته استول سوی تر څو د نوموړي کښتۍ موقیعت معلوم کړي.

د وان جهیل د ایران سره په سرحد او هغه لار کي موقیعت لري چي مهاجرین ورڅخه ترکیې د راتګ له پاره استفاده کوي.  دغه مهاجر چی زیاتره یې افغانان دي، په دې هیله وي چي ترکیې ته تر رسیدو وروسته ښایی وکولای سي د اروپا په لور خپل سفر ته ادامه ورکړي.

ددغي کښتۍ د مړو هويت تر اوسه نه دی معلوم سوی. د « خبر ترک » په نامه تلویزیوني رسنۍ رپوټ ورکړی، چې اټکل کیږي چی دغه مهاجر به له افغانستان ، پاکستان او ایران څخه وي. د ترکیې د کورنیو چارو وزیر ویلي چي تر اوسه ددې پیښي په تړاو ۱۱ تنه نیول سوي دي.

د تیرکال دسمبر میاشت کي هم په دغه جهیل کي یوه کښتۍ ډوبه سوې وه چي ۷ تنو مسافرو یې خپل ژوند له لاسه ورکړی او ۶۴ تنه وژغورل سول. په دغه بیړۍ کي ناست مسافر له بنګله دیش، پاکستان او افغانستان څخه ول.

 ترکیه د شاوخوا ، ۴ میلیونو مهاجرو کوربه دی چي شاوخوا ۳،۶ میلیونه یې له همسایه هیواد سوریې څخه رامهاجر سوي دي.

ترکیې له ۲۰۱۶ م کال راهیسي، له اروپایی ټولني سره د یوه تړون پر اساس، د میلیاردو یورو مالي مرستو په بدل کي ، اروپا ته د مهاجرو د سفر مخنیوی کړی. د روان کال په فبرورۍ مياشت کي کله چي ترکیې اعلان وکړ چي نور به اروپایی ټولنی ته د مهاجرو د ورتګ مخه ونه نیسي ، په زرونو مهاجرو ځانونه د یونان مځکني سرحد ته ورسول، خو سرحدي ځواکونو د هغوی مخه ونیوله.

اعلان