په آلمان کې یوې غوا څرنگه پولیس ښه ډېر ځغلولي دي؟ | آلمان او نړۍ | DW | 22.10.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

په آلمان کې یوې غوا څرنگه پولیس ښه ډېر ځغلولي دي؟

د آلمان په بایرن ايالت کې له کنتروله وتلې یوې غوا پړی شکولی، او سخته گډوډي يې پيښه کړې ده. کله چي د وضعیت د کنترول له پاره پولیس او ان هلیکوپتر مرستې ته راوغوښتل شول، غوا پوليس هم ښه ډیر وځغلول.

د آلمان د بایرن ایالت په زند ام ماین ښار کې یوې غوسه شوې غوا پړي شکولی وو او یو ساعت له کنتروله وتلې وه.

د وضعیت د کنترول له پاره ځايي چارواکو د پولیسو او ان یوې انځور اخیستونکي هلیکوپتر مرسته وغوښتله. د دې سیمې ځايي رضاکاره اور وژونکي هم د مرستې له پاره رابلل شوي ول.

د شنبې په شپه وروسته له هغې چې د غوا څښتن ځايي چارواکو ته له خپل فارم څخه د غوا د تیښتې خبر ورکړ، تر کابو څلورو ساعتونو منډو او هڅو وروسته بلاخره ځايي چارواکي په دې وتوانیدل چې غوا بیرته قابو کړي.

د پولیسو مشر اندریاس وینکر په دې هکله د لیشا میډیا په نامه یوې ځايي رسنۍ ته وویل: «په لومړي سره کې ښايي ډیر جالب وي، خو دا زموږ ډیر خطرناک ماموریت وو.»

لومړی د غوا مالک ویلي ول چې دوې غواګانې يې له فارم څخه تښتیدلي دي، خو تر تیښتې څو شیبې وروسته یوه غوا بیرته ونیول شوه. د چارواکو په مرسته، تر څو شیبو پلټنو وروسته د بلې غوا موقعیت هم وموندل شو چې د یوه سوپرمارکیټ په خوا کې ولاړه وه.

غوسه شوې غوا خپل څښتن هم په لغته وهلي او د پولیسو موټر یې هم زیانمن کړی دی.

غوسه شوې غوا خپل څښتن هم په لغته وهلي او د پولیسو موټر یې هم زیانمن کړی دی.

د موقعیت تر موندل کیدو او د نیول کیدو پرمهال غوا بیرته د ښار پر لوري مخه کړه. د تیښتې په دې موده کې غوا یو شمیر پټي، د میلې یو پارک او ځيني نورې سیمې زیانمنې کړي دي.

تر دې پیښې وروسته، پولیس اړ شول چې ځايي اوسیدونکو ته خبر ورکړي چې د غوا مخه پرانیستې پریږدي. د تیښتې پرمهال غوا پر خپله لار یو کوچنی موټر سایکل او د پولیسو یو موټر هم زیانمن کړی دی.

د غوا څښتن چې په خپله یو بزګر دی، د غوا د آرامولو د هڅې پرمهال هم د غوا له برید سره مخامخ شوی دی او د لغتې یو ګوزار یې خوړلی دی.د چارواکو په خبره د نوموړي وضعیت ښه دی.

وروسته له هغې چې د پولیسو یوې هلیکوپترې د غوا موقعیت پیدا کړ، غوا په یوه داسې سیمه کې بنده وه چې د تیښتې لار یې نه درلوده. پولیسو او د رضاکاره اور وژونکو ډلې د خپلو موټرو په واسطه د غوا مخه ډپ کړې چې بیا وروسته د بې هوښۍ په ډزو غوا تر کنترول لاندې راوستل شوې ده.

د آلمان د خبري آژانس په حواله، د غوا څښتن بیا وروسته د یکشنبې په ورځ غوا بیرته خپل فارم ته انتقال کړې ده.

 

 

اعلان