پاکستان: د افغان سولې د پرمختگ له پاره د افغان مهاجرو ستنيدل غوښتي | سيمه | DW | 30.04.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

سيمه

پاکستان: د افغان سولې د پرمختگ له پاره د افغان مهاجرو ستنيدل غوښتي

پاکستاني چارواکو د افغانستان د سولي پروسې د پرمختگ له پاره له پاکستانه د افغان مهاجرو د بيرته ستنيدو غوښتونکی دی. دا په داسې حال کې ده چې د افغان سولې له پاره د امريکا ځانگړی استازی د دوشنبې په ورځ اسلام آباد ته تللی وو.

د پاکستان د بهرنيو چارو وزارت يوه چارواکي په اسلام آباد کې د افغانستان د سولې له پاره د امريکا متحدو ايالاتو د ځانگړي استازي زلمي خليلزاد په مشرتوب استازو او پاکستاني ديپلوماتانو ترمنځ تر ليدنې کتنې وروسته وويل: «دا [د افغان مهاجرو بيرته ستنېدل] زموږ له هغو وړاندیزونو څخه يو وو چې پر ميز مو ايښي ول.»

پاکستان وړاندیز کړی دی چې امريکا دې له دغه هيواد څخه تر ۲ ميليونه زياتو مهاجرو د بيرته ستنولو په موخه چې له څو لسیزو راهيسې هلته میشت دي، له اسلام آباد سره مالي او لوجستکي مرسته وکړي.

د پاکستان حکومت په ماضي کې د افغان مهاجرو د بيرته ستنولو له پاره په څو وارې ضرب الاجل ټاکلی او بیرته ځنډولی دی.

زلمی خليلزاد او د جنوبي او مرکزي آسيا له پاره د امريکا متحدو ايالاتو د بهرنيو چارو وزارت مرستياله اليس ويلز د دوشنبې په ورځ (۲۰۱۹م کال د اپريل ۲۹ نیټه) اسلام آباد ته تللي ول څو د وسله والو طالبانو او افغان حکومت ترمنځ د مستقيمو خبرو اترو د زمينې برابرولو له پاره د پاکستان مرسته ترلاسه کړي.

خليلزاد تر اوسه د طالبانو له استازو سره په قطر کې د خبرو اترو څو پړاونه ترسره کړي دي، خو طالبان له افغان حکومت سره له مستقميو خبرو ډډه کوي.

ياد پاکستاني چارواکي د نوم نه ښوولو په شرط وويل: «دا هغه څه دي چې دوی [امريکايان] یې زموږ څخه غواړي. يعني د افغان حکومت او طالبانو ترمنځ مستقميمو خبرو اترو ته  لاره هوارول.»

په اسلام آباد کې د امريکا د سفارت له خوا د سه شنبې په ورځ د خلیلزاد د سفر په اړه په جاري کړل شوې اعلاميه کې د نوموړي له قوله ويل شوي چې د اسلام آباد خبرې اترې گټمني وې.

(B.S/N.Z(dpa

DW.COM

اعلان