يونان ته په زرونو نور مهاجر رسېدلي | اروپا ته مهاجرت | DW | 15.02.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

يونان ته په زرونو نور مهاجر رسېدلي

په آژه سمندرگي کې د انساني قاچاق وړونکو پر ضد د ناټو ماموریت تر پیلېدو دمخه، له ترکیې څخه یونان ته د مهاجرو د تگ هجوم دوام لري. د ملگرو ملتونو په وینا په روان کال کې ۷۶۶۰۷ مهاجر یونان ته رسیدلي دي.

د مهاجرو له پاره د ملگرو ملتونو عالي کمیسارۍ د دوشنبې په ورځ ویلي دي چې د روان میلادي کال له پېل راهیسې د فيبرورۍ میاشتې تر ۱۳مې نېټې پورې ۷۶۶۰۷ کډوال له ترکیې څخه یونان ته د آژه سمندرگي له لارې رسیدلي دي. د دوی زياتره سوريايان دي.

دا په داسې حال کې ده چې د تیر میلادي کال په لومړیو دوو میاشتو کې ۴۵۶۷ مهاجر راغلي ول. هغه مهال د مهاجرو ستره څپه لا نه وه پېل شوې. د مهاجرت نړیوال سازمان یا (IOM) د معلوماتو له مخې په آژه سمندرگي کې د روان میلادي کال له پېل راهیسې لږ تر لږه ۳۲۰ انسانان ډوب سوي دي.

د آلمان خبري آژانس په خپل رپوټ کې لیکلي دي چې په ژمي کې له ترکیې څخه یونان ته د راتلونکو مهاجرو په شمیر کې کموالی راغلی وو. زیاته شوې ده چې د تیر کال په اکتوبر میاشتې کې د آژه سمندرگي د ترکي ساحل څخه د یونان ټاپوگانو ته ۲۱۱ زره مهاجر راغلي ول، چې په نوامبر مياشت کې دغه شمیر ۱۵۱ زره او په دسمبر میاشت کې ۱۰۸ زره کسانو ته راټیټ شوی وو.

د یونان د ساحلي څارونکو په وینا د مهاجرو په شمیر کې کموښت د خراب موسم له کبله رامنځ ته شوی وو. د یونان په خیوس ټاپو کې یوه ساحلي څارونکي د آلمان خبري آژانس ته ویلي دي چې دوی انتظار باسي چې په پسرلي کې څه پیښږي.