نړیوالو قدرتونو په افغانستان کې پر ټولشموله دولت توافق کړی | آلمان او نړۍ | DW | 23.09.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

نړیوالو قدرتونو په افغانستان کې پر ټولشموله دولت توافق کړی

د ملګرو ملتونو امنیت شورا ۵ دایمي غړو توافق کړی چې طالبان باید یو ټولشموله دولت جوړ کړي. امریکا ویلي چې د ملګرو ملتونو د عمومي اسامبلۍ تر پايه به په دغه غونډه کې د طالبانو د استازي د حضور په هکله کوم تصمیم و نه نیول شي.

د ملګرو ملتونو امنیت شورا پنځو دایمي غړو د افغانستان په تړاو ګډ دریځ غوره کړی دی چې د چارواکو په خبره تر نظامي تسلط وروسته پر طالبانو د یوه ټولشموله دولت له پاره فشار راوړي.

چین او روسیې تیره میاشت د طالبانو بریا د متحده ایالاتو له پاره د یوې ماتې په توګه یاده کړې وه او له طالبانو سره یې ناستې لرلي، خو لا تر اوسه پورې هیڅ کوم هیواد د طالبانو په رسمیت پيژندلو له پاره کوم ګام نه دی اخیستی.

د ملګرو ملتونو عمومي منشي انتونیو ګویتریش د عمومي اسامبلۍ تر غونډې وروسته خبریالاتو ته وویل چې د امنیت شورا ټول غړي «یو سوله ایز او باثباته افغانستان غواړي چیرې چې بشري مرستې پرته له مشکلاتو او تبعیضه وویشل شي.»

د ګویتریش په خبره هغوی د یوه داسې افغانستان له پاره په هڅه کې دي «چیري چې د ښځو او نجونو حقوقو ته درناوی وشي، داسې یو افغانستان چې د ترهګرو پټنځای نه وي، ټولشموله حکومت د ولس د ټولو پرګنو استازیتوب وکړي.»

د متحده ایالاتو د بهرنیو چارو وزیر انتوني بلېنکن او همداشان د بریتانیا، فرانسې او روسیې د بهرنیو چارو وزیرانو په یوه حضوري غونډه کې ګډون درلود او د چین د بهرنیو چارو وزیر په دغه غونډه کې په مجازي بڼه حضور لاره.

یوه امریکایي چارواکي دغه غونډه چې د بریتانیا د بهرنیو چارو وزیر له خوا رابلل شوې وه «رغنده» بللې او دا هیله پکې څرګنده شوې چې طالبان به د ښځو او نجونو حقوقو ته درناوی وکړي.

دغه چارواکی چې نوم یې نه دی اخیستل شوی د فرانسې خبري آژانس ته ویلي دي: «زه فکر نه کوم چې هیڅوک دې د طالبانو د سرپرست حکومت له ترکیبه راضي وي، د چین په ګډون.»

تر دغې غونډې دمخه په ملګرو ملتونو کې د چین سفیر ژانګ جون، د فرانسې خبري آژانس ته ویلي چې ټول پنځه قدرتونه یو ټولشموله حکومت غواړي.

تر دې دمخه چین د امریکا له لوري د افغانستان د میلیاردونو ډالرو په ارزښت شتمنیو کنګل کولو باندې انتقاد کړی وو.

خو چین له دې سره هم لیوالتیا لري چې دغه ګاونډی هیواد یې د بهرنیو تندلارو پټنځای نه وي.

همداشان افغانستان د ۲۰ سترو اقتصادي هیوادونو د مجازي غونډې موضوع وه، چې پر نورو سربیره پکې قطر هم حضور لاره چې د طالبانو د دیپلوماسې مرکز بلل کیږي.

د آلمان د بهرنیو چارو وزیر هایکو ماس د جي۲۰ هیوادونو ډلې ته په وینا کې یو ځل بیا پر دې اندېښنه څرګنده کړې چې د طالبانو په حکومت کې د دغې ډلې پرته نور څوک نه دي شامل او نه پکې کومه ښځه شته، خو داسې وزیران پکې شته چې د ملګرو ملتونو په تور ليست کې شامل دي.

ماس په خپلو خبرو کې وویل چې د طالبانو له لوري داسې حکومت چې ټولشموله نه وو «یوه تاکتیکي تیروتنه وه، چې دا کار به له هغوی سره زموږ ښکیلتیا سخته کړي.» د آلمان د بهرنیو چارو د وزیر په خبره مهمه دا ده چې هغوی دا له موږ ټولو څخه واوري.

طالبانو د ملګرو ملتونو په عمومي اسامبلۍ کې د ګډون غوښتنه کړې وه، خو امریکا متحده ایالاتو چې د اعتبار سنجولو په کمیټې کې ګډون لري دا خبره روښانه کړې ده چې په راتلونکي اوونۍ کې د عمومي اسامبلۍ تر ختمیدو پورې به په دې هکله کومه پریکړه و نه شي.

DW.COM