نهه ساعته وینا، په امریکا کې حکومتي چاري په موقتي توګه وځنډولې | آلمان او نړۍ | DW | 09.02.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

نهه ساعته وینا، په امریکا کې حکومتي چاري په موقتي توګه وځنډولې

د بودجې د قانون د نه تصویبیدو له کبله په روان میلادي کال کې د دوهم ځل له پاره د امریکا متحده ایالاتو دولتي چاري په موقتي توګه ځنډول شوي دي. چارې د یوې سناتور له خوا تر نهه ساعته وینا وروسته ځنډیدلې دي.

په متحده ایالاتو کې د دوهم ځل له پاره د فدرال دولت چارې له موقتي ځنډ سره مخامخ شوې دي خو د حکومتي چارو ځنډیدل ښایي د لنډې مودې له پاره وي. د پنجشنبې په ماښام د دوه کلنې بودجې د قانون په هکله د متحده ایالاتو د سنا مجلس غونډه بې له کوم توافقه پای ته ورسیده.

یوه توافق ته د نه رسیدو لامل د سناتور رند پاول، سرسخت مقاومت وو چې نهه ساعته یې د بودجې د قانون پر ضد وینا وکړه. هغه وویل چې د بودجې د طرحې پر سر بحث کې د دولتي پور حد په پام کې نه نیول کیږي او په دې ترتیب به په راتلونکو دوو کلونو کې ۳۰۰ میلیارده ډالر د دولت پر پور وراضافه شي.

شل ورځې تر مخه د متحده ایالاتو فدرال دولت چارې هغه وخت وځنډیدي چې د ترمپ د ادارې له لوري د وړاندیز شوې بودجې د لایحې پر سر جمهوري غوښتونکو او دیموکراتانو د نظر اختلاف درلود. خو دغه ځنډ د کانګرس له لوري د موقتي بودجې تر تصویب وروسته پای ته ورسید. دغې بودجې د فدرال دولت لګښتونو یوازې د پنجشنبې (د ۲۰۱۸م کال د فبرورۍ اتمه نیټه) تر ورځې پورې تامینول.

 Senator Rand Paul in Washington (Reuters/J. Roberts)

سناتور رند پاول

د متحده ایالاتو فدرال دولت د موقتي ځنډ په ترڅ کې ټول غیر مهم خدمات دروي. خو پولیس، اطفائیه، په فدرالي تاسیساتو کې روغتیایي خدمات، پستي خدمات، وسله وال ځواکونه او د هوایي ترافیک په برخه کې بوخت کارکوونکي خپل کار ته ادامه ورکوي. له دې سره سره هم ځینې فدرالي ادارې تړل کیږي او کابو نیمایي دولتي کارکوونکي جبري رخصتیږي.

آیا د افغانستان پر جګړې د حکومتي چارو ځنډیدل کوم اغیز لري؟

د متحده ایالاتو د دفاع وزارت په جنورۍ میاشت کې ویلي وو چې د حکومتي چارو ځنډیدل به په افغانستان کې د امریکا پر پوځې جګړې او یا په عراق او سوریه کې د تندلارو یاغیانو پر ضد مبارزې باندې کوم اغیز و نه لري. د هغوی په خبره ټول فعاله پوځي پرسونل به پر خپلو دندو پاتې شي.

سناتور رند پاول، وایي چې اندیښنه لري چې د بودجې نوی قانون به د متحده ایالاتو د لګښتونو په میزان کې د پام وړ زیاتوالی راولي. هغه په خپله وینا کې وویل چې نه شي کولای اجازه ورکړي چې جمهوري غوښتونکي د اوباما د واکمنۍ پر مهال د دیموکراتانو په څیر چلن وکړي او ټول مالي اساسي اصول له پامه وغورځوي.

ښایي د متحده ایالاتو د حکومتي چارو ځنډیدل د ډیرې کمې مودې له پاره وي، ځکه چې د متحده ایالاتو سنا خپلې جلسې ته ادامه ورکړه، څو د بودجې د تصویب په هکله بحثونه وکړي. په سنا کې د دغه قانون تر تصویبیدو وروسته، هغه د وروستي تصویب له پاره د استازو مجلس ته استول کیږي.

زموږ له آرشیف څخه: 

DW.COM

اعلان