له پوځ سره تر خبرو وروسته په کويټه کي احتجاج پای ته ورسید | سيمه | DW | 02.05.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

سيمه

له پوځ سره تر خبرو وروسته په کويټه کي احتجاج پای ته ورسید

د پاکستان پوځ له مشر جنرال قمر جاوید باجوه سره تر بریالیو خبرو وروسته، په کويټه کې شعیه هزاره لږکیو خپل څلور ورځنې احتجاجي پرلت پای ته ورساوه.

د پاکستان د پوځ مشر جنرال قمر جاوید باجوه د بلوچستان ایالت په کويټه ښار کې د هزاره احتجاج کوونکو د ټولو اندیښينو د لیري کولو او د دوی د امنیت د خوندیتوب ډاډ ورکړی دی.

د هزاره گانو مشرانو له دویچه ویله سره په مرکه کې ویلي دي چې لوی درستیز دوی ته ډاډ ورکړی دی چې پر هزاره ګانو برید کوونکي او له هغو سره د مرسته کوونکو پر وړاندې به ډیر سخت اقدامات وړکړي او په هر صورت کې به د دوی د سر او مال ساتنه وکړي.

ویل شوي دي چې د کويټې ښار په لویدیځ بای پاس، علمدار روډ او نورو ځایونو کې به د هزاره ګانو هغه احتجاجي پرلت پای ته ورسوي چې تر ۱۰زرو ډیرو کسانو پکښې ګډون کړی وو.

په دې وروستیو وروځو کې د کويټې په مختلفو سیمو کې په هدفي توگه د هزاره لږکیو د وژنو په پيښو کې تر زیاتوالي وروسته د دغو احتجاجونو لړۍ پیل شوې وه.

د مظاهرې ګډون کوونکو د ملکي حکومت له ټولو لوړپوړو چارواکو سره خبرې بې اعتباره بللې وې او غوښتنه یې کړې وه، تر هغه چې د پوځ مشر کويټې ته نه وي ورغلی او دوی ته یې د دوی د سر او مال د ساتني ضمانت نه وي ورکړی، دوی به د خپلو احتجاجونو لړۍ جاري وساتي.

باجوه له هزاره مشرانو سره په خبرو کې وویل چې بهرنۍ استخباراتي ادارې د ترهګرو ملاتړ کوي او د دغو سازشونو د ناکامه کولو له پاره ولس باید د امنیتي ادارو ملاتړ وکړي.

د پاکستان پوځ له مشر سره په خبرو کې د هزازه ګانو د پلاوي مشري د بلوچستان د شعیه ګانو د شورا مشر سید داود آغا کوله. داود آغا دویچه ویله ته وویل: «د ایالتي او مرکزي حکومت وزیرانو چې زموږ سره کومې ژمنې کړې وې تر اوسه پورې یې نه دي عملي کړي، نو له همدې امله موږ له پوځ سره د خبرو غوښتنه وکړه.»

هغه زیاته کړه چې په دې درې ساعته ملاقات کې ورته قمر جاوید باجوه د هزاره ګانو د قاتلانو د نیولو او په سزا رسولو اطمينان ورکړی دی.

د یادونې وړ ده چې څو ورځې مخکې د پښتنو د حقونو په برخه کې د فعالې ډلې PTM یا «د پښتون ژغورنې غورځنګ» غړو هم په «علمدار روډ» کې د هزاره ګانو په احتجاجي پرلت کې ګډون کړی وو او د پاکستان د امنیتي ادارو پر ضد یې شعارونه ورکول. وروسته تر دې پولیسو د یو شمیر هزاره ګانو پر وړاندې دعوی هم وکړه.

بل لور ته په پاکستان کې د ترهګرۍ ضد ادارې ویلي دي چې پر هزاره اقليت ځانمرګې بریدونو او نورو ترهګریزو پيښو کې لاس درلودونکی قوماندان عبدالرحیم محمد شهي یې نیولی دی.

د نوموړي ادارې مشر اعتزاز ګورایا خبري کنفرانس ته د وینا پر مهال وویل چې د تروریست رحیم محمد شهي د سر قیمت ۲۰۰ زره کلدارې ټاکل شوی وو. دغه کس د پاکستان د منع کړای شوي ګوند «لشکر جهنګوي» غړی دی. دوې ورځې مخکې پاکستاني چارواکو د پاکستان له امنیتي ځواکونو سره په مقابله کې د همدې ترهګرې ډلې د یوه بل قوماندان «مقصود احمد» د وژلو ادعا هم کړې وه.

 

اعلان