طالبان: د افغان ځواکونو پر وړاندې به بريدونه بيرته پېل کړو | افغانستان | DW | 02.03.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

طالبان: د افغان ځواکونو پر وړاندې به بريدونه بيرته پېل کړو

طالبانو ويلي چې د افغان امنيتي ځواک پر وړاندې خپل تهاجمي عمليات بيرته پيلوي او په دې توگه هغه جزوي اوربند ختموي چې له امريکا سره د تړون تر لاسليک کيدو دمخه شوې وو. په عين حال کې په خوست کې يوې چاودنې درې کسان وژلي دي.

د طالبانو له خوا دغه څرگندونې تر هغه يوه ورځ وروسته شوي چې ولسمشر محمد اشرف غني ويلي ول چې د تاوتريخوالي کموالی به لږ تر لږه د افغان چارواکو او طالبانو ترمنځ د خبرو اترو تر پېليدو پورې چې په پام کې ده د مارچ په لسمه ترسره شي، دوام پيدا کړي.

په اصطلاح «اور کم» يوه اوونۍ دوام وکړ او د شنبې په ورځ یې په دوحه کې د امريکا او طالبانو ترمنځ د سولې د تاريخي تړون تر لاسليک کیدو او بيا تر يکشنبې ورځې دوام وکړ.

د طالبانو وياند ذبيح الله مجاهد د فرانسې خبري آژانس ته وويل: «د تاوتريخوالي د کموالي موده اوس پای ته رسېدلې او زموږ عمليات به په نورمال ډول ادامه پيدا کړي.»

نوموړي زياته کړې: «د تړون (د امريکا او طالبانو ترمنځ) پر اساس به زموږ مجاهدين پر بهرنيو ځواکونو بريد نه کوي خو د کابل د ادارې د ځواکونو پر وړاندې به زموږ عمليات دوام پيدا کړي.»

د افغانستان د دفاع وزارت د وياند مرستیال فواد امان وويل چې حکومت هم دا ارزوي چې د تاوتريخوالي موده پای ته رسېدلی او که نه. نوموړي زياته کړه: «موږ تر اوسه په هېواد کې د سترو بريدونو د ترسره کیدو په اړه هیڅ رپوټونه نه لرو.»

خو په عين حال کې د دوشنبې په ورځ په خوست ولايت کې د فوټبال د يوې لوبې پر وخت بمي بريد درې تنه وژلي او ۱۱ نور یې ټپيان کړي دي. د خوست د پوليسو مشر سيد احمد بابازي په دې اړه وويل: «په موټر سايکل کې ځای پر ځای شوی بم د فوټبال د لوبې پر مهال چاودلې دی.»

تر اوسه کومې ډلې د بريد پړه نه ده منلې.

طالبانو د شنبې په ورځ په دوحه کې له متحده ایالاتو سره تړون لاسلیک کړ. د دې تړون پر اساس به بهرني عسکر په ۱۴ مياشتو کې له افغانستان وځي او طالبانو تضمين ورکړی چې د افغانستان خاوره به د نورو هېوادونو پر ضد د ترهگریزو بريدونو له پاره نه کارول کيږي او له افغان حکومت سره به خبرې اترې پېلیږي.