طالبانو د نړيوال کنفرانس د رابللو وړانديز رد کړ | افغانستان | DW | 09.11.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

طالبانو د نړيوال کنفرانس د رابللو وړانديز رد کړ

طالبانو د افغانستان د اجرائيه رئيس ډاکتر عبدالله عبدالله له خوا د علماوو د يوه نړيوال کنفرانس د رابللو وړانديز رد کړی دی. عبدالله دغه وړانديز په سعودي عربستان کي د سفر پر وخت کړې وو.

وسله والو طالبانو ويلي دي چې د نړۍ عالمان دې سره راټول شي خو له دوی یعني له طالبانو څخه دې داسې تمه نه لري چې هغوی به په افغانستان کې د لويديځ د ملاتړه برخمن حکومت ته مشروعيت ورکړي او له دوی څخه به حمايت وکړي.

په افغانستان کې روان زورزياتي ته په کتو سره د افغانستان اجرائيه رئيس ډاکتر عبدالله عبدالله تيره مياشت د سعودي عربستان د سفر پر وخت وړانديز کړی وو چې د علماوو يو نړيوال کنفرانس دې راوبلل شي. د دې غونډي نېټه تر اوسه ټاکل شوې نه وه، خو د عبدالله عبدالله په حواله دا کنفرانس بايد په سعودي عربستان کې جوړ شي.

د طالبانو له خوا «د اسلامي نړۍ درانه عالمان» تر سر لیک لاندې په خپره شوې بيانيه کې ويل شوي چې طالب جنګیاليو په افغانستان کې د لويديځو اشغالګرو پوځونو پر ضد د جهاد بيرغ پورته کړې دی او تمه لري چې  په کنفرانس کې ګډون کوونکي عالمان به دې «جهاد» ته د یرغل نوم ورنه کړي او د افغان حکومت ملاتړ به ونه کړي.

په دې اعلاميه کې دا هم ويل شوي دي چې د افغانستان دښمنان د ناکامۍ په حال کې دي او دوی اوس زموږ د وسله وال جهاد پر ضد د منفي تبليغاتو لرۍ پیل کړې ده.

طالبانو د لويديځوالو دا ګام د روحي فشار اچولو يوه آله وبلله او دا ګام يې د يوې توطيې په توګه ياد کړی. د طالبانو له خوا زياته شوې ده چې مخالفينو اوس په داسې اقداماتو لاس پورې کړې چې مناسب نه دي او په دې ترڅ کې پر درواغو او توطيو سربیره اوس جعلي فتواوو جوړوي.

طالبانو دا هم ویلي دي چې د افغانستان د سولې عالي شورا هم د ډاکتر عبدالله عبدالله د وړانديز ملاتړ کړی او دا هماغه اداره ده چې د دوی (طالبانو) جهادي اقدامات جايز نه بولي.

طالبانو په دې بيانيه کې په څرګندو ټکې کې ویلي دي چې د عالمانو په کنفرانس کې به د شریعي اصولو په ناسمې تشريح سره د دوی د اسلامي جهاد د ناسم ثابتولو هڅه وشي.

DW.COM